Naalakkersuisuugallartut siulitaasuat Hans Enoksen naalakersuisuugallartunilu ilaasortaq Asii Chemnitz Narup maanna Qaanaamiipput, Pituffiup eqqaani nunami piniarfiusumi Narsaarsummi qinngornernik navianartunik mingutsitsisimaneq paasissutissiissutigiartorlugu.
Qaanaami innuttaasunik paasissutissiisoqarneranut inuit 80-t tungaannut amerlassusillit takkupput. Tusarnaartut ilaat Mathæus Johansen isumaqarpoq innuttaasut naammattumik akissutissarsinngitsut.
- Tusagassiutitigut tusarlugu paasissutissanillu annertunerusumik tusarsimanani annilaarnarlunilu toqqisisimananngilaq. Taamaammat saqqummiisoqarnera innuttaasunut pinngitsoorani iluaqutaassaaq, Mathæus Johansen oqarpoq.
Nangipporlu:
- Apeqqutigineqartut ilagaat saliinerup nalaani inuup amiata anillattoorsinnaanera apeqqutigineqartut ilagaat. Tamanna iluamik akineqanngilaq, immaqa ajunnginnerusimassagaluarpoq, ammit nakorsaanik ilaasoqarsimagaluarpat, taama oqarpoq, Qaanaamiit Mathæus Johansen.
Naalakkersuisut marluk Qaanaamut tikeraarnerannut tunngaviuvoq ilisimatuut misissuisarfiata RISØ-p oktoberimi nalunaarusiamik saqqummiussinermigut 1968-imi Thulemut timmisartup nakkarnerata kingorna qinngornerit ulorianartut pillugit takussutissiisoqarsinnaanngormat.
Imaq timmisartup nakkarfiata nalaa siornatigut misissuiffigineqareerpoq, nutaatullu mississorneqarpoq, nuna Narsaarsummiittoq misissuinernik assigiinngitsunik arfineq-pingasunik, taannalu aamma plutoniummimik nassaarfigineqarpoq.
Plutoniummi nassaarineqartoq annertoorujussuunngikkaluarpoq, taamaattorli inunnut Narsaarsummiissimasunut sunniuteqarsinnaasimalluni.
RISØ-llu innersuussutigaa, inuit Narsaarsummiissimasut quui misissuiffigineqartariaqartut.