Qaanaami kommunep karsia imaarukkaluarpoq

Qaanaap kommuneqarfiata aningaasarliornini pissutigalugu kommuneqarfinnut nakkutilliisoqarfimmit nakkutigisaasup karsia ippassaanikkunnili imaarukkaluarpoq, kommunep atukkanik akilersuinerminut 2,1 million koruunit atortariaqarsimammagit. Qaanaap kommunea qaammatip tulliani aningaasaliissutissanit 300.000 koruuninik siumoortumik qinnuteqartariaqarsimavoq, aningaasanullu ingerlaannaq nungummata aamma qaavatigut 1 million koruuninik qinnuteqarsimalluni.

Taama siumoortumik pineq qaammatip tulliani aningaasaliissutissanut kinguneqassanersoq Qaanaap borgmesterianut Jens Danielsenimut apeqqutigaarput imalu akivoq:

- Taama pisoqarnera suliassamik kingusinaartoornermik pissuteqarpoq.

Jens Danielsenip Qaanaap kommuneata Kommuneqarfinnik Nakkutilliisoqarfimmit aamma nakkutrigisaalluni maanna ingerlanera erseqqissaatigaa.

- Isumaqatigiissutigineqarnikuuvoq akiligassanut 2,1 million koruunit sinnerlugit qammammi uani akilerneqassasut. Thule fondtip aningaasaataanut tunngasut massakkut naammassereersimaneqarnissaat eqqarsaataagaluarami, Thulefondtimmi aningaasaataai kommunep aningaasaqarneranut ilaruttoorneqarsimasut immikkoortinneqarnissaat sulissutigineqarami- taamaalillunilu kinguaattoorutaalluni.

Jens Danielsen oqarpoq aningaasanik 300.000 koruunik aammalu 1 million koruuninik qaammatip tulliani kommunemut aningaasaliissutissanut soorunami kinguneqarumaartoq, tamannalu pillugu Kommuneqarfinnik Nakkutilliisoqarfimmik nalilersuilluaqqissaarnerit naapertorlugit pineqarumaarlutik.

- Kommunet allat uagutsinnit ajunnginnerujussuarmik aaqqiiffigineqartarnikuupput, ilaat allaat taarsigassaanngitsunik tunineqartarsimallutik.

Tamanna pillugu jens danielsenip neriuutiginerarpaa nalilersuinermi tamakku aamma eqqarsaatigineqarumaartut.