Qaanaami inunnik isumaginninnermut pisortaq suliunnaarsitaanngilaq

- Qaanaami inunnik isumaginninnermut pisortaq napparsimaneq pissutigalugu maanna sulinngiffeqarpoq, suliffimminillu suliunnaarsitaanngilaq, Qaanaap kommuneani kommunaldirektøri Poul Alex Jensen taama ilisimatitsivoq.

- Inunnik isumaginninnermut pisortaq, Karen Littauerimik suleqateqarsimanini pillugu nassuiaateqarnissaanik piumasaqarfigineqarpoq, angajoqqaaqatigiillu politiinut unnerluutiginnissutigisaasa uppernarsineqarnissaata tungaanut isumaginninnermut pisortaq kommunemit tatigineqartoq, Poul Alex Jensen erseqqissaavoq.

Inunnilli isumaginnermut pisortaq nipangersimasussaatitaanerminik unioqqutitsisimassappat, taava pissutsit kommunep nutaamik isummerfigissagai, suliamullu tunngasumik Qaanaap kommunea immikkut misissuisitsinngitsoq kommunaldirektøri ilisimatitsivoq.

- Kisianni inunnik isumaginninnermut pisortaq nassuiaateqareerpat tamanna isummerfigineqassaaq, Poul Alex Jensen oqarpoq.

Inunnut ataasiakkaanut tunngasunik oqaaseqarniannginnini borgmesterip Jens Danielsenip erseqqissaatigaa.