Qaanaami innuttaasut sipaartariaqarput

Qaanaap Kommunia sutigut tamatigut sipaartariaqarpoq – tamakkuupput borgmester Johanne H. Nielsen innuttaasunik marlunngormat ataatsimiisitsimmat saqqummiunneqartut.

Qaanaami innuttaasut aningaasaqarnerup aaqqinniarnerani naammagittartariaqarnerannik ataatsimiisitsineq imaqarpoq.

- Kommunip karsia pisariaqarnerpaaginnarnut aningaasartorsinnaasoq innuttaasunut oqaatigaara, borgmester Johanne H. Nielsen ilisimatitsivoq.

Aamma oqarpoq kommunip piffissami sivisuumi akiliisitsiniartartumik atorfeqartitsisimannginnera kommunip karsiata aningaasarliorneranut pissutaasoq.

Borgmesterip Qaanaami innuttaasunik ataatsimiisitsineq assut tapersersorneqarluarnerarpaa.

- Ilaana tapersersorluarneqaqaanga, pisarnermit annermik, Johanne H. Nielsen oqarpoq.

Innuttaasut 850-t ilaat qulit missaanniittut marlunngormat peqataasut Poul Alex Jensen Qaanaami kommunaldirektøriugallartoq nalunaarpoq.

Ilanngullugu ilisimatitsissutigaa, kommunip aningaasaqarnera piffissami sivitsulersumi ima aqunneqanngitsigisimasoq, allaat akiligassat ukioq ilivitsoq akilinngitsoorneqartarsimallutik.

Nukissiorfinnut akiligassat 3,2 millioni koruuniupput, karsili imaqanngilaq.

-Inatsisit malillugit pisariaqartitsineq naapertorlugu ikiorsiissutinik taamaallaat tunniussisinnaavugut, suna tamaat sipaarniarfigisariaqaratsigu, kommunaldirektøri oqarpoq.

Naatsorsuuserisoq ikiortissatut tikisitaq suliani piffissap atugassarititaasup iluani naammassisinnaasimanngilai, kingusinnerusukkullu tikiseqqittariaqarumaartoq, Poul Alex Jensen unnerpoq.

Qaanaami kommunip karsia imaarulluinnartoq ikiorserniarlugu, kommuni aningaasanik 7 millioni koruuninik atorniarnissamut qinnuteqaatinik Namminersornerullutik Oqartussanut ippassaq allagaqarput.