Qaanaami innuttaasut silarlunneranik eqqugaapput
![](/sites/default/files/styles/image_934x467/public/article_images/snestorm_630.jpg?itok=CU8v-k00)
- Inuttut assut nalitoorujussuuvoq. Piniutit aalisarnermullu atortut uani annaaneqarput, Qaanaami piniartoq, Rasmus Avike, oqarpoq.
Qaanaami sapaatip akunnerata massuma ingerlanerani silarlunnerani anoraa sekundimut meterinik 50-it tikillugit sakkortussuseqarpoq 22-nillu issilluni.
- Taamaakkaangallu 60-inik issitsigisutut misinnartarpoq, Danmarkimi silasiorfimmi DMI-mi silasiortoq Erik Hansen allappoq.
AAMMA ATUARUK Qaanaami ulussaarsuarlunilu issittupilussuaq
- Innaallagissiorfipput uneqattaarmat, uagut illup iluani isersimasugut anernivut tamarmik ersiinnartunngorlutik qiianarserujussuaratta, Qaanaami piniartoq, Uusaqqak Qujaukitsoq, oqarpoq.
Ukiulli siuliinut sanilliullugu anoraa nalinginnaagaluartoq ilimagisamiit sakkortunerusoq, Rasmus Avike oqarpoq:
- Inuuniarnerup oqimaannerpaaffiani taamatorujussuaq anorersuaratta assut sakkortunaarparput.
Erngup atuarfimmut, meeqqerivimmut, oqaluffimmut qatserisarfimmullu aqqutai issinneranik qaartut, qatserisarfimmiit paasissutissiipput.
Atortunik annaasaqarfiusoq
Taavalu aamma aalisartut piniartullu silarlunnissaanut atortutik isumannaallisarsimagaluarlugit annaasaqaqaat.
- Qaleralinniutit, illuaqqat arlallit taavalu aamma piniartortannguakkulutta qassutaat ningisitereersimassagaluarput, qassutit tamarsuarmik tamaasa annaaneqarput. Ajoraluartumik, Uusaqqak Qujaukitsoq oqarpoq.
AAMMA ATUARUK Qaanaami atuarfik anorersuarnera pissutigalugu matoqqassaaq
Qaanaap kangerlua qimusserfiusartoq sikkorissiartoruttortoq silarlorujussuarneranik aserorpoq. Tamannalu piniarniarnissamut piffissami aggersumi sunniuteqanngitsoornavianngitsoq, piniartut isumaqarput.
- Ingammik juulleriartornerani, pissakilliorfiup nalaani, isorliunerusugut taamatut nalaataqarnerput oqimaatsorujussuussaaq, Rasmus Avike oqarpoq.