Qaanaami innuttaasut atugarliorput

Qaanaami innuttaasut kommunip ingerlanerlunnera pillugu atugarliorput, allatulli iliorsinnaanatik. Kommunip aningaasaqarnerata qanoq inneranik misissuiartortoq qulaajaatinnagu iliuuseqartoqarsinnaanngilaq. Qaanaami pissutsit kommunalbestyrelsemi ilaasortap, Niels Qujaukitsup, Siumumeersup toqqissisimanngissutigai.

-Massakkut inissisimanerput ajortutut oqaatigisariaqarpoq aamma toqqissisimananngitsorujussuuvoq. Kommune aningaasaataarunnikuuvoq. Kommunalbestyrelsemi kingullermik ataatsimiikkatta oqarfigineqarpugut aningaasaataarussimasoq.

Niels Qujaukitsoq, Siumukkormioqatini pingasut, Atassuminngaanniillu siorna anilluni Attaviitsunngortoq ataaseq, amerlanerussuteqarlutik, kommunalbestyrelse marlunngormat ataatsimiimmat borgmesterertik tunuarteriaraluarmassuk, pissutsit qanoq innerat avataanit ilisimaneqalerpoq. Kommune 2,5 millioni koruuninik akiitsoqarpoq, kingunerilu maluginiarneqartalereerput. Aamma innuttaasuni.

-Qaammat kingulleq eqqarsaatigissagutsigu assersuutigiinnartigu meeqqat tapisiaannut tunngasut, tunniunneqarnissaat qaammatip naanissaanut kinguartinneqarpoq, allatut ajornartumik aningaasaqannginneq pissutigalugu. Oqarpoq. Qanormi innuttaasut igaat?

-Kinaluunniit nuannaartarunanngilaq aningaasassaminik soorlu tunineqanngikkaangami pissaqaraluarluni, tassa inuit aamma taanna naammagittaalliutigisimagaat tusarnikuuara.

KNI PIlersuisup akiliisoqarnissaata tungaanut kommunemut pilersuineq ulluni pingasuni sisamani matoqqateqqammerpaa, aamma Nukissiorfiit akiitsut akilerneqanngippata innaallagissamik, imermik kiassarnermillu pilersuineq sapaatip-akunnerata tulliani unitsittalissagaa ippassaq tusarliuuneqarpoq.

Tassa siornali piumasarisaleraluarparput aningaasaqarnermut tunngasut misissoqqissaarneqassasut. Tassa piumasarinikuugaluarparput 2005-imili 2000-ip tungaanut misissueqqissaartoqarnissaa taamanili aningaasartuutissanut tunngasut qaangiiuartualernikuugamik kinguneraa massakkut karsitta imaarunnera.

Niels Qujaukitsoq 1993-imili Qaanaami kommunalbestyrelsemi ilaasortaasoq taama oqarpoq.

Kommunip aningaasaqarnerminik misissuisitassaa piffissami qanittumi tikeriarpat Namminersornerullutik Oqartussanut nalunaarusiaq apuunneqassaaq, taamaasisoqareerpallu Qaanaamut tunngatillugu iliuusissat aalajangersorneqassapput.

Borgmester Johanne H. Nielsen attaveqarfiginiaraluaratsigu iluatsitsinngilagut.