Qaanaami imigassaq taasissutigineqarpoq
Imigassanik kimittuunik avanersuarmi nioqquteqarneq 2007-mili unitsinneqarpoq. Maanna Avanersuarmiut isumasiorneqarput imigassaq kimittooq ammaqqissanersoq. Inuttaasunik ullumi taasititsinikkut tamanna pivoq.
- Kisianni tamanna taasinerinnaassanngilaq. Avanersuarmiut qinnuigisimavagut akissutigisaminnut itisileequllugit. Assersuutigalugu ammaaqqinnissaq sooq tapersersornerlugu nassuiassavaat imaluunniit sooq killilersuinerup ingerlaannarnissaa tapersersornerlugu nassuiassallugu, Qaasuitsup Kommuniani borgmesteri Jess Svane KNR-mut oqarpoq.
Imigassamik nioqquteqarneq matulluinnarneqaraluarpoq 2007-mi maajip qaammataani filmiliortartoq Karen Littauer DR-mi oqaluttuareersoq imigassaq pissutaalluni meerarpassuit sumiginnarneqartartut. Ukiorli taanna imigassamik nioqquteqarneq tamakkiisuunngikkaluamik ammaqqippoq, taamanerniilli imigassat kimittuut nioqqutigineqarsinnaatitaanngillat.
- Maanna innuttaasut isumasiorneqarput. Suliarli isumaginninnermut ataatsimiititaliami suliarineqareeruni kommunalbestyrelsip martsimi ileqquusumik ataatsimiinnissaani saqqummiunneqassaaq - aalajangernissamut tunngavissat taamanikkussamut piareerneqarsimassappata, Jess Svane oqarpoq.
