Qaanaami ilorraap tungaanut ingerlarusuttoqarpoq
Qaanaami imigassamik ajornartorsiuteqartoqaraluartoq pissutsit ilorraap tungaanut maanna saakkiartortut, Qaanaami borgmesteri Johanne H. Nielsen oqarpoq.
Qaanaami innuttaasut 14-ileereersimasut katillugit 620-iusut akornanni siorna ukiumut imigassartorsimaneq agguaqatigiissillugu naatsorsoraanni innuttaasoq ataaseq ukiumut 14,59 literimik imigassartorsimasoq, inuusuttullu 18-it 25-illu akornanni ukiullit imernerulersimasut Pilersuisup politiillu naatsorsuisimanerat ersersitsivoq. Imigassamik ajornartorsiutit annertuut qaangerniarlugit Qaanaap kommunia maanna suliniuteqalereersoq borgmesteri Johanne H. Nielsen oqarpoq:
-Naluneqanngitsutut kommunimi ajornartorsiuteqangaatsiarpugut, tassa kitaata sinneratulli annertunerusumik suliffissaateqanngilagut. Susassaaleqinerlu pissutigalugu imerneq annerulersarpoq.
Qaanaami imigassartornerujussuaq annikillisinniarlugu kommune siornali suliniuteqalersimavoq, ilaatigut ilaqutariinnut ukiumut marloriarluni katsorsaatitsisalersimalluni. Qaqiffimmili katsorsartitsinissamut kommuni akissaqanngitsoq borgmesteri oqarpoq.
- Ilaqutariinnik kingullermik katsorsaareernerup kingorna AA aallartinneqarpoq, taannalu aamma maanna periarfissaalluni.
Johanne H. Nielsen isumaqarpoq imigassamik killilersuilerneq ajornartorsiutinut aaqqiissutiginiarneqarsinnaanngitsoq.
- Killilersuilissagaluarutta ammaqqippata taava kingunissai qanoq issappat, taamatut ajornartorsiut aallaqqaataaniit ingerlaqqilissaaq taamaattumik killilersuinissarput takorloorsinnaanngilara. Inuusuttut imernerulersimapput, Qaanaallu kommunia pinaveersaartitsisumik suli amigaateqarpoq, tamannalu ajuusaarnartuusoq Johanne Nielsen oqarpoq.
- Kisianni inuusuttut ilaqutariinnut katsorsaasarnernut peqataanissamut aamma tikilluaqqusaapput.
Qaanaami inuusuttut suliffissaaleqisut siunissami ilinniaqqissinnaanissaat anguniarlugu kommune piareersarfimmik maanna pilersitsiniarpoq, piareersarfissallu ukioq manna naammassinissaa naatsorsuutigineqarpoq.
