Qaanaami illuatungiliuttut tapersiipput

Qaanaami borgmesterip, Johanne Nielsenip, tunuartinneqarnissaa anguniarlugu atsiortitsinerit Qaanaami kommunalbestyrelsemi illuatungiliuttut taperserniarlugu ippassaq ataatsimiinnerminni aalajangiuppaat.

Taama ilisimatitsivoq Niels Qujaukitsoq, Siumut.

Taassuma, Siumukkormioqatini marluk,

Jens Danielsen aamma Hans Karlsen, attaviitsorlu Panigpak Daorana, peqatigalugit, borgmesterimik tunuartitsiniarnermut tapersersuinertik atsiorpaat.

- Kommunalbestyrelsemi ilaasortat siunnersuutaat malersorneqaratik unitsiinnarneqartarnerat naammagiunnaarparput. Qaanaami ajornartorsiutit qanoq iluarsiivigineqarsinnaanersut Siverth K. Heilmannip aamma Hans Enoksenip siunnersuuteqarfigereeraluarpaat. Taakkuli siunnersuutaat aamma qatangiinnarneqarput, Niels Qujaukitsoq oqarpoq.

Johanne Nielsenip tunuartariaqarneranut tunngavilersuutit arfineq-marluk Qaanaami kommunalbestyrelsep tunngavilersuutigaat.

Atassummiit ataaseq, IA-mit ataaseq, Kattusseqatigiit Partianniit ataaseq, Siumukkunniit pingasut Attaviitsorlu ataaseq Qaanaami kommunalbestyrelsemi ilaasortaapput.