Qaanaami borgmesteri tunuartinngitsoorpaat

maajip 10-at 2006 11:19

Qaanaap Kommuneani borgmesterip, Johanne H. Nielsenip, tunuarnissaanik kommunalbestyrelsemi ilaasortat amerlanerussuteqartut anguniagartik iluatsinngitsoorpaat.

Kommunalbestyrelsemi ilaasortanit arfineq-marluusunit sisamat - Siumumeersut pingasut, Niels Qujaukitsoq, Jens Danielsen aamma Hans Karlsen Attaviitsoq Panigpak Daorana sisamaralugu - borgmesterertik sulinerlunnerarlugu kommunalbestyrelsep ippassaq ataatsimiinnerani tunuaqqusigaluarput.

Amerlanerussuteqaraluarlutilli borgmesteri pinngitsaalillugu tunuartissinnaanngilaat. Taamaakkaluartoq Siumukkut Attaviitsullu tunuartitsiniarnertik ingerlatiinnarniarpaat.

-Kommunip karsia imaqanngilaq, Atassutip siuttuulluni kommune aqussinnaajunnaarpaa, Niels Qujaukitsoq tunuaqqusisut sinnerlugit oqarpoq.

Kommunip innuttaasunik kiffartuussinera ajorsiartorpoq suliassallu piviusunngortinneqarneq ajorlutik. Borgmesterip tunuarnissaanik suliniuterput tamaviaarutigissavarput, Niels Qujaukitsoq oqarpoq.

Borgmesteri Johanne H. Nielsen oqaaseqartinniaraluaratsigu iluatsitsinngilagut, Ilulissanut ataatsimiigiarluni angalammat.