Qaanaami borgmesteri tunuaqquvaat

Qaanaap Kommuneani borgmesterip, Johanne H. Nielsenip, tunuarnissaa, taamaalillunilu atorfini ujamminilu illuatungiuttumut tunniutissagai, kommunalbestyrelsemut ilaasortat amerlanerussuteqartut kissaatigaat.

Kommunalbestyrelsemut ilaasortanit arfineq – marluusunit sisamat– tassa Siumukkunnit pingasunit Attaviitsumillu – nalunaarutigineqarpoq, Atassutip siuttuulluni borgmesteriutitaata kommune aqussinnaajunnaaraa.

Taama isumaqarnerminnut tunngavilersuutit arfinillit tusagassiuutinut nalunaarutiminni allattorsimavaat.

Soorlu allapput, ataatsimiittoqaraangat oqaluuserisassat tamakkiisumik malinneqarneq ajortut, innuttaasunullu kiffartuussineq ajorseriaannarsimasoq. Kommunalbestyrelsemi aalajangiussat ulloq manna tikillugu piviusunngortinneqanngitsut amerliartuinnartut aamma tunngavilersuutigineqarpoq.

Taamammat Qaanaami borgmesterip tunuarnissaa kommunalbestyrelsep piumasariniarpaa, kommunalbestyrelse Radioaviisip aallartinnerani suli ataatsimiippoq.

Borgmesterimik kommunalbestyrelsep tunuaqqusinissaminut taanna aamma periarfissatuaraa. Amerlanerussuteqartummi akerliugaluarpata borgmesteri pinngitsaalillugu tunuartinneqarsinnaanngilaq.