Qaanaami atuarfiup nutaartaa naammassivoq
Qaanaami utaqqisaq persuarsiornartumik ullumi nalliuttorsiutigineqarluni atoqqaartinneqarpoq, tassalu atuarfiup ilassutaa nutaarsuaq.
Atoqqaartinnissaanut borgmesteri oqalugiareermat atualeqqaamit qalersaq qiorneqarpoq.
Oqartoqaannarsinnaavoq, naammassinissaa kinguarluni kinguarluni kiisami naammasseqaaq. Asbestinik piiaanerit, qinnerit 2500-it amigaatigineqartut amerlanerpaat maanna qinneriarneqarsimalerput, atuartullu timersortarfimmi, illuinnarnilu atuartinneqartarsimasut amerlanerit atuarfittaami atuartinneqartalissapput. Avanersuarmi atuarfiup pisortaa qujamasoqisoq Axel Lund Olsen oqarpoq timersortarfimmi qiianaqisumi kaavaajalersorluni atuartitsisarnerit tamaanga killeqartut, qujanaqisumillu atuarfiup ilassutaa nutaarsuaq atulersoq. Atuartitsinerit tamani tamaani ingerlanneqartarsimagaluartut Axel Lund Olsenip erseqqissaatigaa ilinniartitsisut suliassatik naammassisarsimagaat, aamma meeqqat atuagassatigut pilersarutigineqartut malillugit ingerlanneqarsimammata angajoqqaat ernumassutissaqanngitsut. Aamma oqarpoq Atuartut 9. klassimiit 12 klassimi atuartut anguniagassatut atuartitsinneqarnerisa angummatsinneqarnissaannut ilinniartitsunik ikiortissaminnik januaarimi tikittoqassasoq.
