Qaanaami atuarfik naammassereersoq isiginnaaginnarneqarpoq

Qaanaami atuarfik suliarineqarluni naammassineqareeraluartoq maanna isiginnaaginnarneqarpoq. Sanasut atuarfimmut matuersaat tunniutereeraluarpaat, sulili atuartitsivigineqanngilaq. Sapaatip akunneri pingasut matuma siorna Sanasut Viking Byg-imeersut Qaanaap kommuneanut matuersaat tunniuppaat, suliamillu pilersaarusiortup Svend Erik Kirkegaardip suna utaqqineqarnersoq paasisimanngilaa.

Pilersaarutit malillugit ukioq manna aggustip qaammataanili atuarfik piareertussaangaluarpoq, kinguaattoortoqarsimavorli. Septembarip qaammataani aamma kinguaattoortoqaqqippoq, paasineqarmat atuarfik asbesteqarpallaartoq. Tamatuma kinguneraa atuartut timersortarfimmi nilleqisumi angerlarsimaffinnilu ilaanni atuartinneqartariaqartarnerat. Pissutsit taamaannerat atuartuutilinnit toqqissisimanartinneqanngilaq.

Magdalene Andersen marlunnik atuartuuteqarpoq nukarleq 11-nik ukiulik, angajullerlu 13-nik ukiulik. Magdaline oqarpoq atuartut nalusaraat ulloq atuarfiusussaq qanoq ingerlajumaarnersoq, tamanna ajorluinnarsoraa, aamma oqarpoq ilinniagassaqanngisaannartut, fysikimiluunnit atuartitsineq ingerlanngilaq, panialu 13-nik ukiulik upernaamut soraarummeertussaangaluarpoq, pissarsiassamigulli angummannissaa qularnartoq Magdalene Andersen ernumaqisoq oqarpoq.