Qaanaami aningaasaqarniarneq sussaanngilluinnarpoq

maajip 10-at 2006 17:20

Qaanaami aningaasaqarniarneq sussaanngilluinnarpoq. Akiligassat piffissami sivisuumi isumagineqartarsimanngillat.

Nukissiorfinnut imermut, kiassarnermut innaallagissamullu kommunip akiitsui sapaatip-akunnera ataaseq qaangiutsinnagu akilerneqanngippata kommunip illuutai qamiterlugit aallartinneqariaannaapput.

Qaanaaq kommuniunani inuusuuppat immaqa oqaatigissagaluarparput aningaasivia perlernikoq. Kommune akiligassaqangaarami suuteqanngilluinnartutut oqaatigineqarsinnaasoq, kommunaldirektøriugallartoq oqarpoq.

Akiitsut pingaartumik Nukissiorfinnut Pilersuiffimmullu tunngasut innuttaasunut kinguneqarnerloriaannaapput.

Nukissiorfinnut akiligassat qasserpiaaneri oqaatigerusunneqanngitsut ima amerlatigilersimapput allaat kommuni maajip ulluisa 17-ianni, pingasunngorpat tulliani akiliisimanngippat, qamiterinerit aallartinneqartussaallutik.

- Qaanaap Kommunea sullitatut allatulli akiliisimanngippat iliuuseqarfigineqassasoq kalerrinneqareerpoq, Nukissiorfinni pisortaq Svend Hardenberg oqarpoq.

Qamiterisoqalissappat eqqorneqartussat tassaapput illuinnaat aamma illut pisortat ingerlataat soorlu atuarfik utoqqaallu illuat.

- Akiliisoqartariaqarpoq imaluunniit akiliisoqarnissaanik neriorsuisoqartariaqarluni, Svend Hardenberg erseqqissaavoq.

Kommunip akiitsui katillutik koruunit 2,4 millioniupput – kommunimut 850-iinnarnik inulimmut amerlalluinnartut, agguaqatigiissillugumi akiitsut innuttaasumut ataatsimut 3.000 koruuningajaapput.

Qaanaami kommunaldirektøriugallartup taavunga peqqammersup akueriuminaatsippaa kommunip akiligassaminik isumaginnittarsimannginnera. Kommunili avataanit maanna ikiortissarsineqarpoq, ilaatigut kommunip, sivisuumik aningaasanik aqutsinermut pisortaqarsimanngitsup, aningaasaqarnera pillugu kommuninik nakkutilliisoqarfimmut nalunaarusiortussamik.

Borgmester Johanne H. Nielsen oqaaseqartinniaraluaratsigu iluatsitsinngilagut, Ilulissanut ingerlaarmat.

Borgmesteri kommunalbestyrelsemi illuatungiliuttunit sisamanit ippassaq tunuartinniarneqaraluarpoq, kommunip aningaasatigut ingerlanneqarnera ilaatigut uparuaatinut ilaalluni.