Qaanaami akiliisitsiniartartoqalerpoq
Qaanaap kommunea, aningasaaqarnikkut ajornartorsiornernini pissutigalugu 7 million koruunik atorniarpoq, aningaasallu atukkiunneqartut sukannersumik piumasaqaatitalerlugit tunniunneqarput. Qaanaap kommuneani kommuneqarfiit nakkutilliisoqarfiannit nakkutigisaalersumi annertuumik sipaarniartoqassasoq, Namminersornerullutik Oqartussani nunatsinni pissutsinut allaffeqarfiup pisortaa Leif Scharling oqarpoq.
- Aappaagu aningaasanut missingersuummi 40 million kruuninik missingersuusiorfiusumi 6 million koruunit isumaqatigiinniarnissamulluunniit periarfissiinertaqartinnagit atukkanik akiliinissamut illuartinneqarput, Leif Scharling oqarpoq.
Erseqqissaatigaa Qaanaap kommunea ingerlaqqissappat taama sukannertigisumik piumasaqaateqarsimaneq periarfissat kingullersarisimagaat.
Qaanaami innuttaasut akileraarutaat procentimik ataatsimik qaffatsinneqarpoq, tassa 28 procentimiik 29 procentimut. Tamatuma saniatigut soorlu eqqaavilerineq anartarfilerinerlu aamma akisunerulerput taamatuttaaq meeqqerivimmiititsineq aamma akisunerilissasoq Leif Scharling oqarpoq.
Inunnik isumaginnernermi suliat annikillisaavigineqassapput, tassa soorlu ineqarnermut akiliut tamakkiisoq atuisunit akiliutigineqartalissaluni, taamaalilluni Qaanaami ineqarnermut akiliut aamma qaffatsinneqassaaq. Qaanaami akiliisitsiniartartumik atorfinitsitsisoqarpoq, akiligassalinnut akiliisitsiniartartussamik, tassami Qaanaami innuttaasut kommunemut katillugit 10 million koruuninik akiligassaqartut Leif Scharling oqarpoq.
