Qaanaami akiligassarpassuit

juunip 01-at 2006 10:46

Qaanaap kommunia koruunit 5,5 millionit tikillugit taarsigassaqarpoq. Taarsigassat Nukissiorfimmut, KNI Pilersuisumut Arctic Importimullu taarsigassaallutik.

Akiligassat innuttaasut sinnerlugit akilerniarlugit kommunalbestyrelse koruuninik 3 millioninik siorna attartortariaqarsimavoq. Kommuninik nakkutilliisoqarfik Namminersornerullutillu Oqartussat suleqatigalugit akiligassat taarsersorneqarput.

Radioaviisimit maajip aallartinnerani ilanngutassiaraarput kommunip karsia suli akiligassaqartoq, akiligassallu suli saqqummerartut.

Kommunimilu akiligassat misissoqqissaareerlugit koruuninik 5,5 millioninik taarsigassaqarlutik maanna paasivaat, borgmesterilu oqarpoq, taarsersuinissaq Kommuninik Nakkutilliisoqarfik Namminersornerullutillu Oqartussat suleqatigalugit pissasoq.

Qaanaami borgmesteri Johanne H. Nielsen sapaatip-akunnerata tulliata aallartinnerani innuttaasunik ataatsimiisitsissaaq, Qaanaap kommuniani aningaasaqarneq innuttaasunut paasititsissutigineqassalluni.