Qaanaami akiligassarpassuit

Qaanaap kommuniani akiligassat akilinngitsuugarpassuit amerlalluinnarsimapput.

Qaanaap kommunia akiligassanik akiliisinnaajumalluni 3 mio. koruuninik ukioq kingulleq atortariaqarsimavoq. Ukioq mannalu aamma 2 mio. koruuninik akiligassaqalersimasoq, Qaanaami borgmesteri Johanne H. Nielsen oqarpoq.

- Borgmesteriunngikkallarama Qaanaap kommuniani atorfilittut sulininni akiligassat tamakku eqqumaffigalugit siornatigut tikkuartortarpakka, maannalu tassa tamakkorpassuit takkussuuttalerput, Johanne H. Nielsen oqarpoq.

Kommunit kattuffiat KANUKOKA Namminersornerullutillu Oqartussat Qaanaap kommuniata aningaasatigut ajornartorsiornera pillugu Qaanaami borgmesterip ilisimatereernerarpaa.

Taamatuttaaq ministeriuneq Anders Fogh Rasmussen Qaanaamut qanittukkut tikeraarmat allakkiarisimasami kopiia tassunga tunniukkini oqaatigaa.

Suut tamarmik ajorseruttornerisa nalaanni Qaanaap kommuniani atorfilittat aamma allanik taarserput.

Februaarip qaammataani kommunaldirektøri napparsimalluni sulinngiffeqarpoq, aningaasaqarnermullu pisortaq qaammatip uuma ingerlanerani aallassaaq, taamaalillutik taakku suliaat tamarmik kinguartariaqalerput.

Johanne H. Nielsenip maanna oqaatigisinnaannginnerarpaa aningaasatigut ajornartoornerup kingunerisaanik Qaanaap kommuniani sulisut eqqorneqarsinnaanerat.

Qaanaap borgmesteriata nammineerluni ukiuni sisamani Qaanaap kommuniata iluani atorfiit qaffasissut arlallit sullivigereerpai. Kommunalbestyrelsemi ilaasortat arlallit kissaatigigaluarpaat Johanne Nielsenip tunuartitaanissaa, taassumali tamanna akuersaanngilaa.