Qaammatit tallimangajaat qaangiuttut: Kiisami qalatitseqqaartariaaruppugut

54-inik ukiulik, Marie Jakobsen Motzfeldt imermik imersinnaanissaminut kiisami qalatitseqqaartariaqarunnaarpoq.

Taanna nunaqarfimmi Qassimiuni najugaqarpoq. Namminersorlutit Oqartussallu nunaqarfimmi erngup bakteeriaqarnera pissutigalugu imermik qalaasseqqaartoqartarnissaa oktobarip ulluisa 26-anni innersuussutigilerpaat.

Qalatitseqqaarnissamik innersuussuteqartoqarneranit qaammatit tallimanngajaat qaangiuttut qalatitseqqaaqquseq atorunnaartoq, Namminersorlutik Oqartussat ullumi sisamanngornermi nalunaarutigaat.

Marie Jakobsen Motzfeldt qalatitseqqaarnissamik oktobarimi innersuussuteqartoqarmalli imermik ullut tamaasa qalatitsisarpoq.

- Paasigatsigut soorunami qalatsitsisalernissaq malipparput. Naluara nunaqqatikka amerlanerit qanoq issimassanersut. Uagut taamanili ullut tamaasa qalatsitsiinnaavittarpugut imissatsinnik, taavalu qalatseriarlugu nillorseqqaarlugu.

- Eqqarsaatigivarput sooruna taama sivisutigisoq. Sarfamut atuinitta eqqarsaatigalug ullut tamaaviisa arlaleriarluta qalatsitsisarpugut. Qalatsitseqqaartariaqarneq sarfarmut aamma akeqarpoq.

Qalatitseqqaaqqusinerlu maanna atorunnaarmat taassuma tamanna nuannaarutigaa.

- Paasigakku qujaqaanga. Qassimiuni imeq mamartarami, taava qalatsillugu mamaa soorunami allaanerulertarpoq.

Marie Jakobsen Motzfeldt Qassimiuni sivisuumik najugaqarpoq, taassumalu nunaqarfimmi aatsaat siullerpaamik qalatitseqqaaqqusisoqartutut eqqaamaniarpaa.

Qassimiuni inuit 20-t missaanniittut najugaqarput.