Qaammatip ernera isiginnaartitsissusiaq nipilersornertalik
- Takorluukkani piviusunngortikkusutani qallunaatut atorfeqalerluni qaffasissorsuarmik taakkunatut ilinniagaqarluni Danmarkimut ilinniariartoraluarluni, taava ajornartorsiutinik naapitsinini pissutigalugu nakkaakkiartorluni toquinnarusulernissaminik eqqarsalersoq, isiginnaartitsissusiortoq, Juaaka Lyberth taama oqarpoq
Juaakap 1983-mi saqqummersitaa "Oqaluttuat", aallaavigalugu Qaammatip Ernera sanaajuvoq, taanna saqqummersitaa nunatta ineriartorneranut attuumassuteqartoq, Juaaka Lyberth oqarpoq:
- Kinguaariit kingulliit nutarterinerujussuit kingulliit 1960-70-ikkunni alliartortut inuiaqatigiinnilu pissutsit taamanikkut qallunaanngorsaanerup nalaani taavalu kingusinnersukkut namminersuleriartornitsinni aamma kalaalinngorsaanerup tungaatigut inuiaqatigiinni kulturikkut oqaatsitigullu assigiinngitsutigut aporaaffiit.)
Ilinniarnertuunngorniarfimmeersut Qaammatip Ernera sisamanngormat matoqqasumik takutinneqarmat isiginnaariarput. Pissarsiffigineqarluarporlu: - Atuarnerup tungaatigut assorujussuaq pissarsiaqarfigivara. Aamma pineqarami qallunaat nunaannut atuariartorluni sorujussuarmilluunniit angusaqarsinnaatitaalluni,i ilinniarnertuunngorniarfimmi ilinniartoq Sandra Mørch taama oqarpoq.
Isiginnaagassiarlu takoreerlugu inuiattut nukittusariaqartugut aamma paasineqarsinnaasutut nalilerneqarpoq:
- Sapinngilagut, qamuuna ingerlariaqqinnissamut sapinngilagut aamma sunulluunniit, isiginnaariaqataasimasoq,ilinniarnertuunngorniarfimmi ilinniartoq Sandra Kreutzmann Leander taama oqarpoq.
Juaaka Lyberth isiginnaartitsinermi nammineq appisimaaqataassanngilaq.
Isiginnaartitsissusiarli kinaassutsimik akuerinnittoqartariaqarneranik aamma inuiaqatigiittut assigiinngisuteqarsinnaanerup akuerinissaanik oqariartuuteqarpoq, - inuiaqatigiitut ataqatigiinnissaq kulturimik oqaatsinillu pingaartitsinissaq ingerlariaqqinnissarlu, kisianni aamma allaassuteqartut allaassutaat ataqqillugit,
Juaaka Lyberth taama oqarpoq.
Isiginnaagassiaq Qaammatip Ernera Sisimiuni Uummannami, Ilulissani, Narsami, Qaqortumi aamma Tasiilami juunip ingerlanerani takutinneqassaaq.
