Kommunit aaqqissuuteqqinneqarnissaannut piareersaatit imaannaanngillat.
Kommunilli aaqqissuuteqinnissaannut ataatsimiititaliap siunnersuutai maleqqissaartariaqanngitsut qinikkat arlallit isumaqarput.
Ataatsimiititaliaagallartussat uani eqqarsaatigineqarput.
Kommuninut qinersisoqareerpat kommunalbestyrelsit nutaat, kommunit nutaat pilersinneqarnissaata tungaanut piareersaasiortussaapput.
Ataatsimiititaliaagallartussat ukiup aappaata qeqqa atasussatut Aaqqissuuteqinnissamut ataatsimiititaliap siunnersuutigaa.
Ataatsimiititaliarli KANUKOKA-p ataaniittoq isumaqarpoq piareersaasiortussat qaammatit qulingiluaannaat pisariaqartikkaat.
Misilittakkat Danmarkimeersut uani tunngaviginiarneqarput.
Danmarkimi ataatsimiititaliaagallartussat ukioq ataaseq atasussatut naatsorsuutigineqarsimapput, misilittakkalli takutippaat tamanna sivisuallaartoq.
Bornholmimi kommunit kattunniarneqalermata qaammatit arfinillit atorneqarput, tamannali sivikippallaartutut nalilerneqarluni.
Taamaammat KANUKOKA-mi ataatsimiititaliap siunnersuutigaa qaammatini qulingiluani sulisoqassasoq.
KANUKOKA-p 2008-mi februaarimi kommuninut qinersisoqarnissaannik piumasaqaataa inatsisartunit akuersissutigineqassappat, ataatsimiititaliaagallartussat ukioq taanna aggustip qaammataani sulilersinnaassapput, kommunillu nutaat 2009-mi pilersinneqarsinnaassallutik.
