Qaammataasiaq pillugu tupigusunneq

Star Wars-filminut eqqaanalaarsinnaavoq - qujanartumilli raketit allallu galaksit akornanni sorsuunnerni atortutut ittuunngitsut.

Qaammataasiaq aasarli ingerlavimmi aalajangersimasumi ingerlaartoq takuneqartarsimavoq, Amerika Kujalliup qiterpasissua qulaateriarlugu, Atlantikoq qulaallugu Nunatta Sermersua qulaateriarlugu, Asiap qiterpasissuatigut uteqqittarluni.

Amerikami tusagassiuutit arlallit naapertorlugit qaammataasiaq Ruslandimeersuuvoq. Russit majimi nalunaarput qaammataasiat nutaat pingasut qullartinniarlugit.

Kaaviiaartinneqaleqqammersut amerikami aviisit ilaat tatigisaasoq, The Financial Times allappoq amerikami oqartussaasut qilammi qaammaataasiat qullartinneqartut pingasut saniatigut allamik sisamassaannik takusaqarsimasut.

Aallaqqaammut takusartik atorunnaarnikutut ilimagisimagaluarpaat- qaammataasiatut igitatut. Amerikamiulli aviisiat alla The Washington Post naapertorlugu - ilaatigut Pituffimmiit isiginnaakkat takutippaat qaammataasiaq ingerlaartuusoq nunani allamiullu qaammataasiaat qanittuaraallugit ingerlaartartoq.

Qaammataasiaq atserneqarsimavoq Kosmos 2499 kialuunniilli ilisimanngilaa sumut atuunnersoq. Amerikamiut avataarsuanik ilisimatuut isummersuisit Chatham House naapertorlugit, imaassinnaavoq russinit qullartinneqarsimasoq sorsunnermut atugassaanngitsutut, taamaallaalli upalungaarsimanermut annaassiniarnermullu atugassatut. Aammali eqqarsaatersuutinut ilaavoq aallartinneqarsimasinnaasoq nunani allamiut qaammataasaasa imaanik unioqqutitsilluni tilligartussatut - imaluunniit tamakkunannga qatserisussatut aallartinneqarsimasinnaasoq, aviisi allappoq.

Taamatulli eqqoriaanermi aporfik tassaavoq, maanna nunamiit  unioqqutitsilluni qaammataasiat pulaffigineqarsinnaareermata. Qanittukkut kinamiut amerikamiut qaammataasiaat silasiut taamaaliorfigivaat.

Maannamulli KOSMOS 2499 kaaviiaartuarsinnarpoq.

Russillu tamanna pillugu nipangersimaannarput.