Qaammataasaq siku pillugu paasissutissiivoq

Qaammataasaq Cryosat nunarsuarmik kaaviinermini, paasisanik pingaarutilinnik nassiussivoq.
decembarip 21-at 2010 15:40

Europamiut qaammataasiaat Cryosat immap sikuanik uuttortaasarpoq. Qaammataasallu pingaarnertut suliassaraa sikup qanoq issutigineranik sumiinneranillu uuttortaaneq, siunissamilu sikup qanoq ikkumaarneranik, immallu qanoq qaffatsigiumaarneranik, missingersuusiussalluni.

Qaammataasaq Cryosat iluaqutigalugu ilisimatusartut Ualerngup imartaani, Atlantikup avannaata imartaani nunattalu kujataata imartaani sarfap assinganik nutaamik sanasimapput; taamaalilluni immap sikua sumut ingerlaartarnersoq, immallu sarfaata allanngornera annertunerusumik paasineqarsinnaalluni.

Immap sikuata issussusaanik uuttortaanermi qaammataasap uuttortaanera issittuni angallannermut pingaaruteqarpoq.

Immap sikuata issussusaa aamma uumasunut pingaaruteqarpoq. Issittunimi immap sikua ukiuni kingullerni annikilliartorsimavoq, tamannalu nannunut kinguneqapilutitsivoq, nannummi sikumi puisinniartarmata, sikullu saappallaalerneratigut sumiiffiillu ilaanni sikuerutivissimanera nannut uumaniarnerannut sunniuteqarnerluppoq.

Dr. Seymour Laxon, ilisimatusartunut qaammataasap paasissutissatut katersaannut suliarinneqataasoq, BBC News-imut oqarpoq, maanna paasisat siulliusut, siunissamilu annertunermik paasisaqarumaarlutik, taamaalillunilu sikup allanngorneranut malinnaanerusinnaalissallutik, silallu pissusaata allanngornerata qanorpiaq kinguneqarneranik paasisaqarsinnaassallutik.

Geofysikkimut tunngatillugu San Franciscomi ataatsimeersuarnermi sapaatip akunnerani uani pisussami ilisimatusartut paasisaminnik saqqummiissapput.