Qaammataasaq misiliut kiisami qangattartinneqarpoq

Aalborg Universitetimi qaammataasalerinermik ilinniartut misiligummik qaammataasaliartik, balloni ikiorsiullugu 35 kilometerinik qutsissusilimmut sapaatiummat qangattartippaat.
Allattoq Elisa Isaksen
oktobarip 12-at 2009 14:38

Qaammataasap ineriartortinneqarnera naammassippat, Nunatta qulaani 700 kilometerinik qutsitsigisumiilissaaq, taamaalilluni umiarsuit AIS-ikkut aallakaatitaat tigoorarsinnaaniassammagit. AIS tassaavoq, umiarsuit annerusut tamarmik akuttunngitsumik aallakaatittagassaat, sumiiffiat taamaalilluni paasineqarniassammat.

Qaammataasaq misiligutaasoq massakkut 10 gange 10 centimeterinik angissuseqarpoq pingasunngormallu aallartinneqarnissaralua kinguartinneqareersoq, avataarsualiartarfimmit, Sverigep avannaani, Kirunap avannaaniittumit, ippassaq iluatsittumik aallartinneqarpoq.

Nalunaaquttap akunnerini arlalinni misilerarneqareersorlu balloni silaannaarneqarpoq, nalunaaqutarlu 15.25 aallartinneqarfimminiit 205 kilometerinik ungasissulimmut nunnilluni.

Qaammataasap qangattartinneqavinnissaa, 2010-mi imaluunniit 2011-mi pinissaa naatsorsuutigineqarpoq. Qaammataasaq naammassiguni annerusussaassaaq, Nunattalu eqqaani umiarsuartigut angallannermik 700 kilometerinik qutsissusilimmit nakkutilliisalluni.