Qaammataasaq Marsimut mippoq

Qaammataasaliaq ippassaq sapaammi unnukkut siullerpaamik angerlamut nalunaaruteqarpoq. Qaammataasaliaq taanna Mars Polar Lander-itut iluseqarpoq, Mars Polar Lander 1999-mi silaannarsuakkut ingerlaarnermini periarfeerunneqarnikuuvoq. Massakkullu una Phoenix Landerimik taaguutilik aamma siulimitulli siunertaqartitaavoq tassa ulloriarsuarmi Marsimi uumassuseqartoqarneranik alaatsinaanniartussaagami.

Qaammataasaliap taliusaa atorlugu marsip nunataanik meterimik ataatsimik qilleritinneqassaaq taamaalilluni marsimi nunap iluani sikoqaratarsinnaaneranik misissuisinneqassalluni. Qaammataasaliartaaq assigiinngitsukkaanik laboratoriaqarpoq, sakkortoorsuarnik isaannarmik takuneqarsinnaanngitsunik qinnguteqarluni, silasiorfeqarluni assiliiviillu erseqqissumik qalipaatillit nunarsuatsinnut nassiussugassat pigalugit.

Naatsorsuutigineqarpoq qaammataasaliaq marsi qerinnarsitinnagu tassa ullut 90-t qaangiutsinnagit nunarsuatsinnut paasissutissanik nassiussuilissasoq.

Qerinnarsippammi qaammataasaliaq aserorneqarsinnaavoq, ukiorli anigussappagu naatsorsuutigineqarsinnaavoq aappaagu aamma nassiusseqqissinnaassanersoq.

Tamannali piffissap takutikkumaaraa erseqqissaatigineqarpoq.