Qaammat ataaseq 106 kilonik oqilisut
Sanigorsarnermik ingerlatsinermi Qasigiannguani peqataasut 36-upput. Aaqqissuisut ilimagisimagaluarpaat aqqaneq marluk missaat taamaallaat peqataajumaartut. Maanna peqataasut arlallit aalajangerput timigissartarneq orsukitsunillu nerisaqarneq ingerlatiinnarniarlugu.
Suliniut aallartippoq Maaji peqqinnartuutiguk Qasigiannguani aallartimmat. Soqutiginnittut nammineq iligiinnik sisamanik inuttaqartunik pilersitsisinnaatitaapput, maajillu aallaqqaataani nalunaartut iligiit qulingiluaapput.
Peqataasut sapaatip akunneranut arlaleriarlutik timigissartarput aammalut efterskolemi igasumit nerisassat pillugit siunnersorneqarlutik. Maannalu tassa suliniut iluatsilluarpoq.
- Peqataasut ippassaq oqimaalutarpagut tassanilu paasivarput katillugit 106,5 kilonik oqilisimasut. Sanigornerpaasimasoq qaammatip ataatsip ingerlanerinnaani 8 kilonik oqilivoq, Qasigiannguani pitsaaliuinermi siunnersorti Kristian Rosing KNR-mut unnersiorpoq.
Suliniut iluatsilluarmat suli annerusumik suliniarnissaq pileritsaanneqarpoq.
- Maaji peqqinnartuutiguk pillugu ingerlatsineq juunimi nalilersussavarput. Kisianni eqqartulereerparput sanigorsertitsineq sivisuninngorlugu ingerlanneqarsinnaasoq, Kristian Rosing oqarpoq.
Peqataasut isumassarsitinneqarsimapput peqqinnartunik nerisaqarnissamut timigissarnerunissamullu.
- Arlallit oqaluleerput timigissartarneq orsukitsunillu nerisaqarneq ingerlatiinnarniarlugu. Inuit timersuutaannik ingerlatsisut periarfissiisimapput nukittorsarnermi sanigorsertut sungiusaqataasarnissaannut. Taanna sungiusartarneq aasaanerani ingerlaannartussatut pilersaarutaavoq, Kristian Rosing oqarpoq.
