Qaammartartulerlutik qaqqasiortut siarngutsitsisut

Nuummi politeeqarfik innuttaasunit isumaaluttunit arlalippassuarnit Ukkussissani qaammartitsisaqattaartunik takunnissimasunit tallimanngormat unnukkut sianerfigineqattaarneqarput. Kingusinnerusukkulli paasinarsivoq angutit pingasut qaammartartulerlutik qaqqamut majuarsimasut.
januaarip 17-at 2011 11:10

Tallimanngormat unnukkut nalunaaqutaq 21.00 Nuummi politeeqarfik kalerrinneqarpoq, Ukkusissat qaqqaani immaqa ajornartorsiortoqartoq. Tassami qaqqamiit qinnguartartoqarmat. Qinnguartartoqarnerata kingorna politiit takunnissimasunit 150 aamma 200 missaannit sianerfigineqarput.

Politiit qaqqap ataanut alakkaatinneqarput, takusinnaasimavaallu qaqqami inoqarpasittoq. Politiillu qaqqamut majuarniartunit kalerrinneqarsimannginnamik, isumaqalersimapput ajornartorsiortoqarasoralugu. Qatserisartut aggersarneqarput, qatserisartullu tallimat qaqqami ajornartorsiortunut ikiuinissaminnut ilinniarsimasut periareersarneqalerlutik.

Qatserisartut qaqqap ataani qullitik tungujortut ikittaartillugit piareersaleruttortut, qaqqamut majuartut ilaat sianerpoq paasiniaalluni susoqarnersoq, ilisimatitsillunilu namminneq ajornartorsiunnginnerminnik.

Taamaattumik politiit innuttaasunut kajumissaarutigaat unnukkut silap taarnerani pisuttuarniarunik, qaammaqqutimik mianersuutiginissaannut, imaluunniit qaqqamut aallannginninnermini politiinut nalunaaruteqaqqullugit.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq