Qaammammut 3,3 millionit koruuninik akiliinerusalissapput
INI A/S-ip inissiaataani attartortut 6512-t oquup annertuup piiarneqarneranut akiliisussanngorput. Oquup piiarneqarnissaa akisorujussuussaaq. Illunut inissianullu akiliutaasartut ukiuni amerlasuuni appasippallaarsimapput, akiliutit qaffanneqarnissaannut politikkikkut akisussaasuusoq oqarpoq.
Inissiani najugaqartut 6.237-t qaammammut akiliutaat qaammamut 500 koruuninik qaffassapput, illuni 275-ni najugaqartut qaammammut akiliutaat 1000 koruuninik maajip aallaqqaataani qaffassapput. Qaffaataat oquup piaarneqarnissaannut atorneqassallutik.
Ajornartorsiut qaangerneqassapput inissianut illunullu akiliutit qaffanneqartariaqartut, Ineqarnermut Naalakkersuisoq Jens B. Frederiksen oqarpoq.
Inissiap 64 kvadratmeterisut angitigisup iluarsartuunnera 350.000 koruunit missaannik akeqartarpoq, Inissiaatileqatigiiffimmi INI A/S-imi inissianik aqutsinermut pisortaaneq Jeanette Holding taamatut oqarpoq.
INI A/S-ip illuutaata ataatsip oqummik annertuumik eqqugaaqqasup suliarineqarnera 700.000 koruuninik akeqarsinnaasoq Jeanette Holdingip aamma oqaatigaa.
INI a/s-ip inissiaatai illuutaalu oqummik eqqugaasut iluarsartuunneqarnissaannut INI a/s-imi najugaqartut kisimik aningaasartuutigisussaammatigit, ineqarnermut akiliutit qaffanneqarnissaat aalajangiunneqartoq Jens B. Frederiksen oqarpoq.
Inissiaatileqatigiiffiup INI a/s-ip inissiat illullu attartortittagai, Namminersorlutik Oqartussat pigisaraat, INI a/s-ip isumagisaralugit.
- Inissiat illullu oqummik eqqorneqarsimasut maannakkut misissorneqarput nalunaarsorneqartillu Jeanette Holding oqarpoq.
Nuna tamakkerlugu inissiat illullu oqummik eqqorneqartut tamakkiisumik naatsorsorneqanngillat, maannamut Nuummi inissiat 177-it oqummik eqqorneqarsimasut nalunaarsorneqarsimapput, taakkualu iluarsartuunneqarnerinut 13 millionit koruuninik akeqartussatut naatsorneqarsimasut, Jeanette Holdingip oqaatigaa.
Inissiat illullu oqummik eqqorneqartut nunarput tamakkerlugu amerliartorput:
- Inissiat illullu oqoqartut amerliartuinnarput, ajornartorsiullu maannakkut aaqqiivineqanngippat siunissami akisoorujussuanngussaaq, Ineqarnermut Naalakkersuisoq Jens B. Frederiksen oqarpoq.
INI A/S-ip inissiaataani illutaanilu attartortut najugaqarfigisaminni oqoqarneq pillugu ullormut ataaseq marlulluunniit INI a/s-imut nalunaaruteqarlutik saaffiginnittarput.
