Qaamaneq eqqumiitsoq ulapputigineqarpoq

Norgip avannarpasissuani qilammi qaamaneq eqqumiitsoq takuneqarmat Norgimi silasiorfimmi sulisut siarnerfigitigaaramik ulapputingaatsiarsimapput.
decembarip 09-at 2009 16:17

Takunnittut oqaluttuarput qaamaneq qinnikaartuusimasoq, ullaarlu nalunaaqutaq arfineq-pingasunnguliivissoq minutsini marlunni/-pingasuni takuneqarsinnaasimalluni.

- Qaamanerujussuaq ammalortoq qilammi erseriataarpoq. Siaruariartupallappoq, qinngornerlu qorsuk nunap tungaanut qinngorpoq, takunnittut ilaat Norgimi internetikkut aviisimut VG-mut oqaluttuarpoq.

Silasiortut aviisimut oqaluttuarput, aatsaat taama tupinnartigisumik takullutik. Sunaanersorli nassuiarsinnaanngivippaat:

- Nalulluinnarparput sunaanersoq - aamma eqqoriarnissaa merseraara, takunnittulli oqarput alutornaqalunilu, kusanaqalunilu tupinnaannartoq, Tromsømi silasiorfimmi pigaartoq, Trond Robertsen, oqarpoq.

Ilaatigut eqqoriarneqarpoq qaamaneq eqqumiigineqartoq taanna russit raketiutigisimassagaat. Ruslandimili aallartitaqarfimmiit tusagassiortunut attaveqartartoq internetikkut aviisimut VG-mut oqarpoq, qaamanermut Norgip avannarpasissuani takuneqarsimasumut tunngasunik paasissutissanik tunniussaqarsinnaanatik.