Puussiat akimut ersittut atorneqartalerput
Nassatat tigummiaannagassat imerpalasunik qaartartunik ilaqarnissaat annilaanngatigalugu puussiat akimut ersittut atorneqartalernissaat malittarisassiuunneqarpoq, taakkulu Københavnip mittarfiani ullumimiit atorneqalerput. Tipigissaatit nakorsaatillu tigummiaannagassamiitsillutik puussiaaqqanut 1 deciliterinut poortorneqareeraangamik puussiamut 1 liiterimik angissusilimmut pooqqinneqartalissapput.
DR-imi tusagassiortoq Niels Jakob Schødt Københavnip mittarfianit ullaaq ima oqaluttuarpoq:
- Nalunaaquttap akunneri arlallit suut tamarmik ajunngillat. Ilaasussat ikiartorfissamik eqqaanni imerpalasut tigummiaannagassaminniittussat eqqissivillutik poortorpaat. Kisiannili arfineq-pingasut qulingiluallu akornanni timmisartut aallarnerpaaffiini isumannaallisaanermik suliaqartut isaariaanniit tummeqqat ammut naallugit tunniussisarfiup killingata tungaanut utaqqisorpassuaqaleraluarpoq. Tamatumalu kingunerisaanik nalunaaquttap akunnerata missaani kinguaattoortoqarpoq. Qulilli qeqqata missaani suna tamarmi pissusissamisut ingerlaqqilerpoq, Niels Jakob Schødt oqaluttuarpoq nangillunilu:
Maani Københavnip mittarfiani pisortap tullia aperilaarniarlugu nikorfaqatigaara. Maani ulluni tulliuttuni tattoqisaattoqannginnissaa anguniarlugu qanoq iliussavisi, akivorlu:
- Isumannaallisaanissaq anguniarlugu misissuisarfitsinniit ilaasussat tigummiaassaminnik tigusisarfiisa nalaanni aaqqiisussaalluta maanna takusinnaalerparput, taanna aaqqiiffigissavarput unnugu matoreerutta, Mogens Kornbo oqarpoq.
Taanna DR-imit apereqqinneqarpoq qaqugu mittarfimmi pisartut nalinginnaasunngoqqissanersut, imalu akivoq:
- Ilaasussat uagullumi sulisuusugut sungiussinissarput tamatumani apeqqutaalluinnarpoq. Taamaattorli sapaatip-akunneri arlaqanngitsut nalinginnaasumik sungiussinissarput naatsorsuutigaara, Københavnip mittarfiani pisortap tullia, Mogens Kornbo naggasiivoq.
Sioqqutsigaatsiarluni, sapinngisamik nalunaaquttap akunneri marluk sioqqullugit, mittarfiliartarnissaq siunnersuutigineqarpoq. Tipigissaatit quliutillu kuffertinut ikineqartarnissaat aamma siunnersuutigineqarluni.
