Puulukit pillugit Danmarkimi ataatsimeeqataarput
Danskit puulukinik tunisassiortut ullumikkut lastbiliutillit puulukinik uumasunik angallassisartut ataatsimeeqatiginiarpaat.
Puulukinik tunisassiortut nalunaaquttap akunneri 24-t sinnerlugit puulukinik uumasunik angallassisarneq unitsikkusuppaat.
Tamatumunnga patsisaavoq, tv-aviisimi ippassaq unnukkut Ruslandimut puulukinik uumasunik angallassinermit assilisat uissuumminartut takutinneqarmata.
Ajornartorsiut unnuaq ataatsimiissutigineqarpoq ullaarlu Nunaateqarneq pillugu Siunnersuisoqatigiinni siulittaasoq Peter Gæmelke iliuusissatut pilersaarummik saqqummiussaqarpoq:
- Uumasunik angallassinerit nalunaaquttap akunnerinit 24-nit sivisunerusut EU-llu avataanut ingerlanneqartartut tamaasa unitsikkusuppavut. Tamatumunnga patsisaavoq assilisat ippassaq unnukkut takusavut akuerisinnaanngilluinnaratsigik, tassami uumasuutitta pitsaasut taama pineqarnerat akuerineqarsinnaanngilaq, Peter Gæmelke oqarpoq.
Puulukit angallanneqartariaqartut angallanneqarnerminni ajunngitsumik pineqassapput. Tamanna puulukinik tunisassiortut siulittaasuata Torben Poulsenip ataatsimiinnermi puulukinik angallassisartunut piumasaraa.
- Uumasunik sivisuumik angallassinissamut malittarisassaqartariaqarpugut taakkualu malinneqanngippata uumasuutitta allanit angallanneqarnissaat isumagisariaqassavarput, Torben Poulsen oqarpoq.
Ataatsimiinnermi uumasunik angallassisartut peqataatinneqarput. Taakku ilagaat Niels Vinderslev Randersimeersoq. Ullut 14-ikkaarlugit nalunaaquttap akunneri 24- t sinnerlugit puulukit 550-it lastbiliminik angallattarpai.
- Pisut kingulliit avammut saqqummiunneqartut amiilaarnaqaat, tunisassiornermullu akornutaalluinnarlutik. Taamaattumik ajornartorsiut iliuuseqarfigineqarniassammat ataatsimiigiaqataavunga, Niels Vinderslev oqarpoq.
Naalakkersuinermik suliaqartut nunaateqarnermik ingerlatsisut iliuusaat naammagisimaarpaat, taamaattorli kisimiillutik iliuuseqarsinnaannginnerat isumaqatigiissutigineqarpoq. Unioqqutitsinernut amerlanerusunik akiliisitsisoqartariaqarpoq immaqalu iluanaarutit arsaarinnissutigineqartariaqartut oqaatigineqarpoq. Tamakkua inatsisinut atortitsinermut ministereqarfimmi maanna isumaqatigiinniutigineqarput.
