Puulukit nualluutaannut akiuussummik ujaasileruttorput
Virusit nuallutsitsisartut assigiinngeqaat sukkaqisumillu allanngoriartortarlutik. Taamaammat nualluummik nutaamik takkuttoqarneri tamaasa akiuussutissamik nutaamik ineriartortitsisoqalersarpoq. Puulukit nappaataat takkummat aamma nutaamik nassaarniartoqalerpoq.
WHO-p pisoq nakkutigeqqissaartussaavaa puulukillu nappaataannut akiuussutissamik nassaarniarneq siuarsassallugu WHO-mi visegeneralsekretæri oqarpoq.
Virusilli nualluutit allanngorartuuneri pillugit akiuussutissamik ineriartortitsineq qaammatini sisamaniik arfinilinnut sivisussuseqarsinnaasarpoq millionerpassuarnillu akeqartarluni.
Nualluummullu uunga akiuussutissamik nassaartoqaraluarpalluunniit akiuussutissamik naammattumik sanaartorneq suli qaammatini arlaqarnerusuni pisinnaavoq.
WHO-miit nalunaarut malillugu nakorsaasiorfissuit sisamat akiuussutissamik atorsinnaasumik nassaarniarlutik sulipput. Nakorsaasiorfiilli WHO-miit kajumissaarneqarput nukissatik tamaasa akiuussutissamik nassaarniarnermut atussanngikkaat.
Nunarsuaq tamakkerlugu nualluut una tuniluutilinngippat nakorsaasiorfiit akiuussutissaliornertik nalinginnaasoq ingerlatiinnassagaat WHO-miit nassuiaasoqarpoq.
Nunarsuaq tamakkerlugu inuit, ukiumut millionit kuartiata affaatalu missaaniittut, nualluummik nalinginnaasumik toqquteqartarput. Inuit maannamut 152-it puulukit nappaataannik toqquteqarput.
