Puulukit nappaataat upalungaarsarfigaat
Utoqqaat, naartusut meeqqallu tunillanneqarnissamut ulorianartorsiornerusut, Canadami ilanngutassiortutta Marianne Stenbækip oqaatigaa.
Canadami maannamut paasinarsereerpoq, puulukit nappaataanit eqqugaanerpaat tassaasut nunap inoqqaavisa illoqarfii nunaqarfiilu. Tamatumunnga ilaatigut patsisaasorineqarput, peqqinnissakkut pitsaanngitsumik sullissineq, ilaatigut nakorsaqannginneranik pissuteqartoq aamma inuit illuni pisoqqani aserfallassimaqisunilu amerlavallaarlutik najugaqatigiittarnerat. Tamatuma saniatigut inuit ilarpassui, tassa indianerit naggueqatigiinnillu Inunneersut arlaatigut puammikkut nappaateqareernermikkut, puulukit nappaataanik tunillanneqarnissaminnik ulorianartorsiornerupput. Matumani naartusut utoqqaat meeqqallu tunillatsinnissamut ulorianartorsiornerullutik.
Canadami peqqissutsimut ministeri Leona Aglukkaq, Nunavummeersuusoq, nunap inoqqaavisa kattuffii suleqatigalugit upalungaarsimanissamut pilersaarusiorpoq. Ilaatigut matumani pineqarlutik nunaqarfinnut imeqarniarnikkut ajornartorsiorfiusunut imermik minguitsumik pilersuisoqarsinnaalernissaa. Tamatuma saniatigut qanermut assiaqutinik assaallu asannissaannut qaqorsaatinik pilersuisoqassaaq, taamaalilluni tunillaassuineq killilersimaarneqarniassammat. Peqqissutsimut ministerip nunap inoqqaavisa kattuffiineersut qaammatit tamaasa ataatsimeeqatigisarniarpai, pitsaanerusumik ilisimatitseqatigiittarnissaq pilersaarutillu malinneqarnersut malinnaaffigineqarniassammata.
Sapaatip akunnerani kingullermi peqqissutsimut ministeeriaqarfimmit kukkusoqarneratigut, "toqusunut puussat" nunaqarfinnut sisamanut nassiussuunneqarsimapput. Tamanna paasineqarluarsinnaasumik nunaqafimmiunit aalassaatigineqaqaaq, tassami isumaqartoqalermat nunap inoqqaavi amerlaqisut puulukit nappaataanik toqquteqarnissaat ilimagineqarsimammat, naalakkersuisut tamakkuninnga nassiussuisimasut. Tamannali kukkunermik patsiseqarpoq, peqqissutsimullu ministerip tamanna utoqqatsissutigereerpaa.
Canadami naalakkersuisut akiuussutissamik kapuuisoqarnissaanik piareersaasiorput, akiuussutissamik piareersimasoqaleriarpat kapuuineq aallartinneqarsinnaaniassammat.
