Puulukit nappaataannut Pisiffik upalungaarsarpoq

Puulukit nappaataat siaruaatilermalli nunarsuaq tamakkerlugu eqqiluisaarnermut atortut, soorlu qaqorsaatit, qaqorsaatit imerpalasut serviettillu tunisaalluarsimapput.
Allattoq Elisa Isaksen
septembarip 09-at 2009 07:54

Eqqiluisaarnermut atortut tamakkorpassuit nunatsinnut aamma tikiussuunneqarput. Pisiassat tamakkua bakteeriaajaatit ullut arlaqanngitsut qaangiuppata Pisiffiup pisiniarfiini pisiarineqarsinnaalissasut, Atuagalliutini allaaserinnittoqarpoq.

- Piumaneqarnerat naapertorlugu qaqorsaatinik serviettinillu bakteeriaajaatinik inniminniivugut, Søren Olsen Damgaard Pisiffimmeersoq Atuagalliutinut oqarpoq. Taassuma nioqqutissat tamakkua sapaatip akunnerata tulliani pisiarineqarsinnaalernissaat naatsorsuutigaa.

Kalaallit Nunaanni Brugsenit tamatumunnga allatulaaq periaaseqarput. Tassani tuniniaanermut pisortaq Finn Christiansen nassuiaavoq, nappaatip qanoq atugaatiginera takoqqaarlugu Brugsenit eqqiluisaarnermut atortunik inniminniilersaarput.

- Suli inniminniinngilagut, tassami pisariaqartitsisoqalissagaluarpata pisiassat piaartumik tikisissinnaagatsigik, Finn Christiansen Atuagalliutinut oqarpoq.