Puttaamiilluni saavigussaasoq annaappaat
Pituffimmi politiit piniartumik puttaamiilluni saavitaasumik tallimanngormat annaassiniartariaqarsimapput.
Piniartoq aappaqarluni ulluni pingasuni silarluliussaasimavoq, tallimanngormalli angerlarniarsimallutik.
Tassanngaannaq aappaata siku qupisoq takuvaa, taassumalu qamutini sikumut aalaakkaasumut sangutinnissaat angumerisimavaa. Piniartup aappaa taama iluatsitsitiginngilaq, puttaamiiginnarlunilu 10 x 50 meterisut annertutigisumi, tissukarlunilu.
Piniartup aappaa Pituffimmut tikimmat unnoreersimavoq, aatsaallu arfininngornermi politiit helikopterimik ujariartorsinnaasimavaat. Nassaarigamikku kilometerit 20-t tissukareersimavoq.
Piniartoq qulimiguulimmut qaqinneqarpoq, qimmiili qimaannarneqarlutik – taakkualu ullumikkut annaanniaraluarneqassapput.
- Piniartoq ajunngivippoq. Oqorsarluarsimavoq neqaateqarluarlunilu, soorunalimi qimmini qimaannartariaqarsimagamigit ajuusaarluni, Pituffimmi politiit ittuat, John Hansen, oqarpoq.
