Vladimir Putin oqalugiarniarunartoq russit tusagassiorfiisa marlunngornermi unnukkut allaaserisalereerpaat. Marlunngornermili oqaluarani pingasunngornermi ullaakkut oqalugiarpoq.Assi: Handout/Ritzau Scanpix

Putinip sakkutuut piareersimasut 300.000-t Ukraineliartinniarai

Ruslandip nunaminik illersuiniarluni atorneqarsinnaasut tamarmik atorneqarnissaat piareersimaffigigaa, Vladimir Putin oqalugiarnermini oqarpoq.

Ruslandip præsidentia Vladimir Putin nunaqqatimut pingasunngornermi oqalugiarnermini sakkutuut sorsunnissamut piareersimanissaat nalunaarutigaa.

Nutaarsiassaqartitsivik Reuters taama allaaserisaqarpoq.

Sorsunnissamut piareersarneq pilersaarutit malillugit erngertumik aallartinneqassaaq.

Sakkutuut 300.000-t Ukrainemi sorsunnissamut piareersimatinneqarniartut, Ruslandip illersornissamut ministeriata Sergej Sjojgup Putinip oqalugiareernerata kingorna ilisimatitsissutigaa.

Ruslandip illersornissamut ministeria naapertorlugu russit sakkutuui 5937-t Ukrainemi sorsunnermi maannamut toqutaasimapput.

Kisitsisit arlaannaannulluunniit attuumassuteqanngitsunit uppernarsarneqarsimanngillat, tamannalu pillugu nalorninartortaqarsinnaallutik.

Russit 80.000-t angullugit Ukrainemi toqutaasimanngikkunik ikilerneqarsimasinnaasut, USA-p illersornissamut ministereqarfiata Pentagonip aggustimi nalilerpaa. Kisitsisilli taakku aamma nalorninartortaqarput.

AAMMA ATUARUK Biden: Ukrainimi sorsuunneq ilorraap tungaanukariartuaarnersoq oqaatigiuminaappoq

Putinip Ruslandimi innuttaasunut toqqaannartumik oqalugiaataa Ruslandip Ukrainemut ukioq manna februaarip ulluisa 24-anni saassussinerata kingorna siullersaavoq. Ukrainemut saassussinerup aallartinnerani februaarip ulluisa 24-anni kingullermik oqalugiarpoq.

Ukrainep kangisissortaani nunaminertap Donbasip aniguisinneqarnissaa Ruslandimit anguniarneqartoq, præsidentip oqalugiarnermini oqaatigaa. Nunap immikkoortui Luhansk Donetskilu Donbasimi inissisimapput.

Nunaminertat taakku Ruslandimik pingaartitsisunik sorsuttoqalernerup siuliani ilaatigut innuttaqarput. Luhansk tamakkingajallugu Ukrainemi sorsuttoqarnerani russinit tiguarneqarsimavoq, Donetskillu affaata missaa russinit tiguarneqarsimalluni.

Ukrainemi nunap immikkoortuini sisamani Ruslandip tiguarsimasaani Rulandimut atassuteqalernissamut piaartumik innuttaasunut taasititsisoqassasoq malunngornermi nalunaarutigineqarpoq.

Putinip pingasunngornermi oqalugiarnermini "inuit tapersersorlugit" oqaatigaa.



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl