Ruslandimi illuatungiliuttut siuttuata, Aleksej Navalnyj-p, Ruslandip præsidentia Vladimir Putin videoliami isornartorsiorpaa, pasilliutilli Putinimit ilumuunnginnerarneqarput. Nutaarsiassaqartitsivik AFP taama allappoq.

Navalnyj-p videoliaa Youtubekkut saqqummersinneqarpoq, Putinillu Sortehavip eqqaani illuutai 8 milliardit koruunit pallillugit nalillit takuneqarsinnaallutik. Illuutit Putinimit pigineqartut videoliami oqaatigineqarpoq, peqquserluttuliornikkullu aningaasalersorneqarsimaneragaallutik.

- Uannit ilaquttanniilu qaninnernit pigineqanngillat, pigineqarsimanngisaannarlutillu, Putin, videoliaq akunnernik marlunnik sivisussusilik pillugu oqarpoq. Pigisat pineqartut Ruslandip iluani immikkut naalagaaffittut aamma taaneqarput, Putinilu tassani naalakkatut inissisimalluni.

AAMMA ATUARUK Tyskit nunanut allanut ministeriat: Navalnyj piaartumik iperagaasariaqarpoq

Navalnyj, Putinimik isornartorsiuisut nuimanersaattut ilisimaneqartoq, sapaatit-akunnerata naanerani parnaarussaavoq. Navalnyj Ruslandimi siorna aggustimi toqunartutortinneqarluni toqoriaraluarneqareerlunilu, Ruslandimut uternermini tigusarineqarpoq maannalu parnaarussaaqqalluni. Putin toqutseriaraluartuusoq Navalnyj oqarpoq, Putinilli pasilliutit ilumuunnginnerarpai.

Putinip illuutinik taama annertutigisunik piginninnera pillugu videoliaq isumaqatissarsiorniarluni præsidentimillu saassussilluni videoliaasoq, Putin oqarpoq.

Putin akerliuffiginiarlugu inuit nuna tamakkerlugu arfininngorpat katersuutissasut, Navalnyj-mik tapersersuisut tuusintilikkaat kaammattuutigaat.