Putin juunip 21-anni peqataassaaq
Nunatsinni namminersorneq juunip 21-ianni nalliuttorsiutigineqalerpat peqataarusulluni Putin tupaallannaqisumik nalunaarpoq, russit naalakkersuisuisa allaffeqarfiat ippassaq unnukkut kingusissukkut taama nalunaarpoq.
Nutaarsiassaq politikerinit ullaaq-manna oqaaseqarfigitissinnaasimanngilarput, Namminersornerullutilli Oqartussat nunanut allanut tunngassuteqartunut allaffeqarfianniit tusarfik, aterminik taaserusunngitsoq, oqarpoq, Kalaallit Nunaannut tikeraarniarluni Putinip nalunaarutaa allaffimmi ulapititseqisoq.
- Tikeraarnissap politikikkut nalilernissaata saniatigut, Putinip nalunaarutaa pissutigalugu sutigut tamatigut isumannaallisaanissaq eqqarsaatigisariaqarparput, tamatumalu qanoq iliuuseqarfiginissaa massakkorpiaq nalulluinnarparput, tusarfik nangippoq.
Ruslandip Issittumut soqutiginninnerulernera Putinip Kalaallit Nunaannut tikeraarnialerneranut pissutaalluarsinnaavoq.
Pissutaasorli aamma tassaasinnaavoq, russit maanna præsidentiata, Dmitrij Medjedevip, Putinillu massakkut pissaaneqarniunnerat.
Putinip Ruslandimut kiffartuussinermini pisortatigoortumik pisussaaffeqarnerunissaa kissaatigalugu Medjedev ippassaq oqarpoq, Ruslandimilu naalagaajunnaarnera paaseqquaa, nassuerutigeqqullugulu.
Taamaattumik Putinip Kreml-imi pissaaneqarniunnermit peersikkallarnissaa, Kalaallit Nunaannullu tikeraarniarnera, Medjedevimut immaqa ilorrisimaarnaannassaaq.
