Putin Danmarkimut tikeraarpoq

Ruslandimi ministeriuneq Vladimir Putin nuimasunik angalaqateqarluni Københavnimut ullumi tikissaaq.
Allattoq Elisa Isaksen
apriilip 26-at 2011 05:44

Ruslandimi pisuunerpaaq Vladimir Lisin angalaqataassaaq. Taassuma suliffeqarfiutaata Novolipetsk Steel-ip Danmarkimi suliffeqarfik DanSteel nakkutigisaraa.

Nukissiuutileqatigiiffissuup Gazpromip qullersaa Alexei Miller aamma peqataassaaq. Taanna Lisin peqatigalugu angalaqatigiinni siulersortaassasut, Reutersimi allaaserineqarpoq.

Vladimir Putinip tikeraarneratigut siunertaavoq, inuussutissarsiornikkut nittarsaassinermik, niueqatigiinnermik, teknologimik atuinermik minnerunngitsumillu nukissiornermik siuarsaanissaq. Gazprom-ip aamma DONG Energyp issittumi gassimik qalluinissamut anguniagassatut isumaqatigiissummik atsioqatigiinnissaat, tikeraartoqarnermi pisussat ilagaat.

- Ilisimatusarnikkut, teknikkimillu qaffasissumik atuinermi suleqatigiinnerup annertusarnissaa pingaartinneqassaaq, Putinip Danmarkimut tikeraarnissaa sioqqullugu, russit naalakkersuisui taama ilisimatitsipput. Assersuutitut taaneqartut ilagaat uumassusilinnit pisunik atortussiorneq aamma nakorsaasiornikkut tunisassiorneq.

Vladimit Putinip Københavnimi tikeraarnermini ilaatigut A.P. Møller Mærsk pulaassavaa, Danmarkimilu inuussutissarsiornikkut siuttut arlallit ataatsimeeqatigissallugit.

Putin angalaqataalu Danmarkimeereerunik Sverigimut ingerlaqqissapput, ilaatigut oqarasuaateqarnikkut attaveqaateqarnermi suleqateqarneq oqaluuserineqassallutik.