Pussukulaartuinnanngorluni issinnialerpoq
Maanna Nunatsinni issisiortutut misigigaanni sapaatip akunnera tulleq issittorujussuartut misinnartussaassaaq. Tassami Qaanaami 40 angungajallugit issittussanngorpoq Nuummilu 17-18-nik issittussanngorluni.
DMI'p ilimasaarutaa malillugu sineriak tamakkerlugu tallimanngornermiit issingaatsiartussanngorpoq.
Nuummi 17-it missaannik ississaaq anorilu avannaq sekundimut 10-11 meterimik sukkassusilik ilannguteriaraanni suli issinnerujussuartut misinnartussaavoq.
Sisimiuni suli issinnerussaaq tassami sisamanngorpat 25-it sinnerlugit issittussanngorpoq.
Avanersuarmi piniartut atisatik ammit oqortorsuit iluaqutigissaqaat piffissami aggersumi piniariartarnissaminni. Tassami 35-it sinnerlugit issilertussaavoq. Avanersuarmiulli issi sungiusimavaat ullumikkorpiarlu 28-it missaliorlugit issippoq.