Pukeq, Inuialuk piniartoq kisimi peqataavoq
Issittup silaannaata allanngoriartornera pillugu Islandimi ataatsimeersuarnermi Issittumi nunallit inuiisa piniarnermik inuussutissarsiuteqartuini pingasuinnaat peqataapput. Tamannalu ugguarnartoq Randal Pukeq Canadami Inuialuit 7000-it tungaannut amerlassuseqartut sinnerlugit ataatsimeersuarnermut peqataasoq oqarpoq. Randal Pukeq piniartutut inuuniuteqartuuvoq, nunaminnilu nunap immikkoortuisa ilaat sinnerlugu aallartitaalluni.
Inuialuit nunarput Canadami koorujusuit ilaannik kooqarpoq, nunatsinnilu nannunik puisinik aalisakkanik tuttunillu inuuniuteqarpugut taamaalillutalu Canadami inuinnit allanit inuuniarnerput allaanerusutut oqaatigineqarsinnaavoq, Randal Pukeq oqarpoq.
Taamaattorli nunaminni silaannaap ukiuni kingulliunerusuni allanngoriartornera malunnarnerarpaa. Ingammik piniartuunermik inuussutissarsiuteqartut eqqarsaatigalugit.
Inuusukkallarma ukiup ingerlanerani piniariartarnigut assigiinngitsut piffissani aalajangersimasuni pisarput, ukiunili kingullerni sila assut naatsorsoruminaalliartorpoq, tamannalu pissutigalugu piniakkat ilaat piffissaq eqqorlugu takkutissaarnikuupput. Soorlu qilalukkat upernaakkut piffissami aalajangersimasumi takkuttartut ukiuni kingullerni ilaatigut sapaatit akunneri arlerlugit kingusinaartalernikuupput. Piniariartarfiit ilaat ungasissumiipput, piniakkallu takkunniaasaartalernerat pissutigalugu utaqqinermut piffissarujussuaq atortarparput, allanik sammisaqarfissaraluarput, Randal Pukeq oqarpoq.
Silaannaap allanngoriartornerata piniakkat takkuttarnerat aamma sunnerpaa, Randal Pukeq oqarpoq allanngornermullu ilisimatuut paasinnilersimanerat qujanartutut isigisariaqartoq oqaatigalugu. Taamaattorli inuit issittumi nunallit akunnerminni silaannaap allanngorneratigut ajornartorsiutaaleriartortut pillugit attaveqatigiinngippallaarnerat uggornartuunerarpaa. Uggornartuunerarpaa issittumi unuallit inuii amerlanerusunik ataatsimeersuarnermut aallartitaqannginnerat.
– Ilisimatuut paasisaat qujanartuupput aammali pitsaassangaluarpoq silaannaap allanngorneranik misigisaqarsimasunik eqqugaasunillu peqataasoqartuuppat, aamma taakku paasisassaat taamaalillutik amerlanerulissangaluarmata, ataatsimeersuarnermimi paasissutissarpaasuarnik tunioqqarneqarlutalu tunniussassaqarpugut, Randal Pukeq oqarpoq.
Randal Pukeq Canadami Inuialuit sinnerlugit Islandimi ataatsimeersuarnermi peqataasoq taama oqarpoq.
