Pujortuleeqqami inuttat pingasut tigusarineqarsimapput

Nanortalimmi pujortuleeqqami 36 fodsimi angissuseqartumi inuttat pingasut politiinit tigusarineqartut maanna paasinarsivoq.
Allattoq Jaaku Lyberth
aggustip 26-at 2009 14:16

Pujortuleeqqami inuttat pingasut tigusarineqarlutik tigummigallagaasut aamma innuttaasunit oqaatigineqarpoq. Nanortalimmi eqqartuussivimmi inatsit tunngaviusoq naapertorlugu inuttanik pingasunik killisiuisoqarnersoq oqaatigineqarumanngilaq. Suliarlu matoqqasumik ingerlanneqarnersoq naqissuserneqarumanani.

Pujortuleeraq sinerissami nakkutilliisut angallataannit ingiallorneqarluni sapaatip akunnerata siuliani Nanortalimmut tikippoq. Pujortuleeqqap tikinneranit Nanortalimmi innuttaasunit qanillattoqqusaanngitsoq, innuttaasut ilaat radioaviisimut oqaluttuarpoq.

- Nanortalimmi politiit qimmiat kiisalu Narsarsuarmi politiit ikiaroornartumik misissuinerminnut atatillugu qimmiat atorlugit pujortuleeraq misissiffigineqarpoq, innuttaasut ilaat oqarpoq.

Pujortuleeraq pineqartoq normoqanngilaq ateqaranilu, taannalu qallunaat erfalasuannik erfalasuaraqarpoq, qallunaamillu piginnittoqarluni.

Paasissutissat pigisagut Kalaallit Nunaanni Politiit qullersaqarfiannit oqaaseqarfigineqarumanngillat.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq