Pujortartunut timmisartortitseqatigiiffik

Allattoq Mads Lynge
novembarip 10-at 2006 17:42

- Ilaasunut eqqaasitsissutigissavarput timmisartumi pujortartoqarsinnaammat.

“Smintair”-imut ilaasussat siulliit 2007-imi oktobarip 28-anni timmisartumut ikigunik taama oqarfigineqassagunarput. Smintair uannga naalisagaavoq: Smoker’s International Airways.

Tassa pujortartartunut timmisartuutileqatigiiffik.

Timmisartortitseqatigiiffimmik aallarniisoq tassaavoq 55-inik ukiulik pujortartorujussuaq suliffeqarfinnillu aallarniisartoq Alexander Schoppmann. Taassuma timmisartorsuit Boeing 747-t pingasut attartorniarpai, Tysklandimi Düsseldorf-ip Japanimi Tokyo-p aamma Kina-mi Shanghai-p akornanni ilaasunik angallassisussat.

Taassuma angalatitseqatigiiffiani ilorrisimaartoqartassaaq.

Timmisartorsuit 559-inik ilaasoqarsinnaagaluartut 138-iinnarnik ilaasoqartassapput. Tassa bareqassagamik, cubamiut sikaaliaannik sikaatorfigineqarsinnaasunik, suannik akisunerpaanik kaviarinik nerisoqarsinnaassalluni vodkatortoqarsinnaassallunilu. Aamma akileraaruteqanngitsunut pisiniarfinni niiverniartoqarsinnaassaaq imaluunniit issiavissuarnut maavaartunut ingiinnarluni timmisartorsuarni saqisunut qinullattaaginnartoqarsinnaassaaq.

Kisianni angallavinni bilitsit akisunerit akisunerpaallu kisimik pisiarineqarsinnaassapput, soorlu Tokyo-mut uterlugu bilitsi 50.000 koruunit 75.000 koruunillu akornanni akeqassaaq.