Pujortartartut qiimmaarinnerusarput

Pujortartarunnaarnissamik pikkorissartinneqarnissamik neqeroorfigineqartarumaartussanut siunnersuutitsialammik naggasiuteqariarta. Pujortartartut pujortartarunnaaraluarunilluunniit upperiuartariaqarpaat, inuttut namminneq ilisarnaatitik pigiinnassallugit.

Tupa qanoq navianartigisoq pujortartartut namminneq nalunngilluinnarpaat. Pujortarunnaarusukkaluarluni taamaatinniarnermik ajornakusoortitsisarnermut pissutaasarpoq, inuppassuit inuunerminni pissutsimik kinaassutsimillu allanngorujussuarnissaannik ernumasarnerat. Ilisarnaatitut pissutsitik, soorlu misilittagaqarusunneq akerliliiumatuunerlu pujortartartut imminnut ilisarnaatigitikkajuttarpaat, misissuinerillu takutippaat pujortartartut tamakku iperarusuppallaartanngikkaat.

Misissuisitsisuuvoq suliffeqarfissuaq Nicotinell – tupanut taarsiullugu assigiinngitsunik nioqquteqartartoq – nunani killerni pujortartartut pujortarunnaarusukkaluartut 2.200-t pujortarunnaarniarnerminni sooq taama ajornartorsiortiginersut paasiniarsimavaat. Misissuinerup paasinarsitippaa 70 procentinit amerlanerit isumaqartut, pujortartartut pujortartanngitsuniit misilittagaqarusunnerusartullutillu qiimmisaartuunerusartut. 60 procentit isumaqarput imminnuinnaq eqqarsaatigisarlutik. Ukiorpassuarnili pujortartarsimasut pujortarunnaarnissartik tupinnanngitsumik ajornakusoortinnerusarpaat.

Pujortarunnaaqqusilluni Nicotinellimit ussassaarisartut neqeroorfigineqarput; pujortartartut pujortartanngitsutuut inuunertik allanngortittariaqanngikkaat. Allatulluunniit oqarluni; pujortartartut tassaaginnarsinnaapput misilittagaqarusulluinnartut imminnuinnarlu eqqarsaatigeriannguarlik.