Pujortartartut immikkut pujortartarfeqalissappat?

- Inuit tamat ornittagaanni soorlu kaffisorniartarfinni neriniartarfinni assigisaannilu immikkut pujortartarfeqalernissaanut peqqussuteqalernissamik, Inatsisartuni ilaasortaq Siumumeersoq Doris Jakobsen siunnersuuteqarpoq. Nuummi illoqarfiup qeqqani kaffisorniartarfiit ilaannukarluta siunnersuutigineqartoq pillugu isumasiuivugut, kaffisorniartarfimmilu naapitatta ilaat ima isummersorpoq:

- Immaqa pingaaruteqarpoq caféuteqartut tamatuminnga aperissallugit. Assersuutingalugu Katuami pujortartarfeqarpoq, taannalu isertartunit assut iluarineqartartoq paasinarpoq. Katuami pujortarfeqarmat isertut sumut ingissinnaanertik aalajangersinnaavaat. Isumasiorneqartoq isumaqarpoq inuit tamat ornittagaanni immikkut pujortartarfeqalernissaq taamaammat eqqarsaatigilluaqqaartaraiqaartoq.

Kaffisorniartarfimmi sulisut isumaqarput immikkut pujortartarfeqalersoqartuuppat tamanna kaffisorianut sunniuteqanngitsoornavianngitsoq:

- Ulluinnarni maannaga isaasartut isumaaat ima paasisarpara nuannarisorujussuusaraat pujortarsinnaagamik maani, eqqissillutillu taama issiaarsinnaaneramik, taannalu ataqqivara.Taamaattorli immikkut pujortartarfeqarsinnaanera aamma pitsaassangaluartoq sulisoq isumaqarnerarpoq. Sulisup aappaa tapersiivoq:

- Pujortartanngitsut assut maniikkusunneq ajorput, tamannalu assut annaasaqarfigisarparput. Iluassangaluarpoq maani pujortartarfeqartuuppat, kisianni manna inissaqarpiannginnami.

Doris Jakobsen-ip siunnersuutaa Inatsisartut ullumi oqaluuserisassaannut ilaavoq. Nuummi hoteliutillit Doris Jakobsen-ip siunnersuutaanut qanoq isumaqarnerat pillugu paasiniaaffiginiaraluaratsigit iluatsinngitsoorparput.