Nunap immikkoortortaani nakorsat ittuata, Henning Sloth Pedersenip siuariartortoqarnera nuannaarutigaa.Assi: KNR

Qulaarpaa Pujortartartut ikilisimagaluartut suli ajornartorsiuteqarpoq

Inuit pujortassaarniarnissaannik suliniut angusaqarfiuvoq iluatsilluartutullu taaneqarsinnaalluni. Puakkulli kræfteqalersartut suli amerliartorput.

Ataatsimulli isigalugu Nunatsinni nuannaarutissaqaqisugut, nunap immikkoortortaani nakorsat ittuat, Henning Sloth Pedersen isumaqarpoq.

- Ukiut 30-t matuma siornanut sanilliukkaanni ingerlalluartorujussuuvoq, Hennings Sloth Pedersen oqarpoq, oqaatigalugulu misissuinerni amerlasuuni piffissaq uuttuiffiusoq sivikittartoq.

 

Cigaretsinik eqqussuineq

Innuttaasut 14-ileereersimasut akornanni inummut ataatsimut naatsorsorlugu 1994-imi cigaretsinik 8,7-inik eqqussuisoqarsimasoq takusassiami quppernerup naqqaniittumi takuneqarsinnaavoq. Eqqussuineq 2004-mi cigaretsinut 3,0-inut appariarpoq.

 

Taamaalilluni ukiut 20-t ingerlanerini cigaretsinik ulloq unnuarlu atuineq affaannanngortinneqarsimavoq.

 

Naatsorsueqqissaartarfik

- Taamaasillutalu nunanut allanut uagutsinnit siullioqisunut sanilliuttarpugut, taamaaliornerlu naapertuilluarnerujuaannarne- ajorpoq, nakorsaq oqarpoq.


Nunarput naalagaaffinnut qeqertaniittunut nunap inoqqaavinik inoqartunut, minnerunngitsumillu Nunavummut Nunavimmullu sanilliullugu peqqissuuneq eqqarsaatigalugu ajornerunngeqisoq, Henning Sloth Pedersen isumaqarpoq.

Aammami angusarissaarpugut.

- Utoqqqaat amerlanerulerput. Qujanaqaaq. Tamannamiuna sulissutigigipput, Henning Sloth Pedersen oqarpoq.

Neriuffiulli inuit puamikkut kræfteqalertut amerliartornerat takusinnaavaa. Ukiuni amerlasuuni peqqinnanngitsumik inooreernermi malunniuttussaq.

Pujortartarneq

1993 - 68 procentit ullut tamaasa pujortartarput.

1999 - 58 procentit ullut tamaasa pujortartarput.

2014 - 57 procentit ullut tamaasa pujortartarput.

 

Ullut tamaasa pujortartartut ukiuni kingullerni 15-ini ikiliartorsimanngikkaluartut, pujortartartut ullormut pujortartagaasa ikilisimanerat nuannaarutissaavoq. Ullormut pujortarneqartartut amerlassusaat siorna 10,6-init 8,1-inut ikilisimapput.

 

Najoqqutarisaq: Kalaallit Nunaanni innuttaasut peqqissusaat 2014


- Pujortartarnerup pilersitaanik nappaammik atugaqalersartut amerliartorput, Neriuffiup siulittaasua, Sara Brandt, aamma Aasianni atuarfimmi pisortaasoq oqarpoq.
 
Pujortartartulli innuttaasut 57 procenterilersimavaat.
 

Aamma atuaruk Eqiasuppallaarpugut, pualavallaarlutalu


Aamma pujortartartut pujortartagaat qangarnit ikinnerulersimapput. Tamanna Henning Sloth Pedersenip Sara Brandtillu tupat akitsornerinik peqquteqartippaat.

Ajoraluartumilli meeqqat inuusuttuaqqallu amerlasuut suli pujortartartut taakkua takusarpaat.

Sara Brandtip pujortartalertartut ukiukilliartortut allaallu 3. klassini atuartut pujortartalersimasut takusarpai.

15-inik ukiullit 43 procentii ullut tamaasa pujortartartuusut, kisitsisit kingulliit takutippaat.

Taamaammat isummanik allanngortitsiniaanissaq suliassarujussuusoq, Heninng Sloth Pedersenip qularutiginngilaa.

Taava politikerit tupanik akitsuikutsoorsinnaasut, taanna isumaqarpoq.

Najoqqutarisaq: Kalaallit Nunaanni innuttaasut peqqissusaat 2014

Isummersuutit


 

Pages