Pujortartartut ikiliartorput
Innuttaasut 14-it sinnerlugit ukiullit, 1996-imi agguaqatigiissillugu 3.585 graminik pujortarput, 2008-mili atuineq agguaqatigiisillugu 2.296 gramminut appariarsimavoq.
Tupamut atuinermut paasissutissat Peqqissutsimut naalakkersuisup Agathe Fontainip, Inatsisartunut ilaasortamut Malik Berthelsenimut, akissuteqaataani atuarneqarsinnaapput.
Aammattaaq inuusuttut pujortartartut 1994-miilli ikiliartortut kisitsisit takutippaat. naak inuusuttut ullut tamaasa pujortartartut 2002-mi misissuinermut sanilliullugit 2006-imi amerleriarsimagaluartut.
Pujortartarnermut inatsit 2004-mi allanngortinneqarmat, inuusuttut 18-it inorlugit ukiullit pisiniarfinni piseqqusaajunnaarput. Sukaterisoqarneratigut meeqqat atuarfiini pujortaqqusiunnaartoqarpoq, pisortallu suliffeqarfiutaanni pujortartarnerit suli sukateriffigineqarnissaat Inatsisartut aappaagu upernaakkut ataatsimiinnissaannut Naalakkersuisut pilersaarutigaat.
Pujortartarnerup navianarnera ersersinniarlugu cigaritsit puuini ersisaarutitalersuisoqassanersoq, Naalakkersuisut aamma misissorniarpaat.