Pujortartartut atugarlunnerulissapput
Apriilip aallaqqaataani naalakkersuisut siunnersuuteqarput.
Aappaagu januaarip aallaqqaataaniit atuutilersussamik, naalakkersuisut siunnersuutigaat illoqarfiup killeqarfiisa iluanni aqqusiniinnarmi pujortartarnerup inerteqqutaalernissaa.
Unioqqutitsinermi 200 koruuninik akiliisitaasoqartalissaaq, pingasoriarlunilu unioqqutitsisoqarsimappat pinngitsaaliisumik katsorsarneqartalernissaq aamma siunnersuutigineqarpoq.
Inatsisartut upernaaru ataatsimiilerpata siunnersuut saqqummiunneqassamaarpoq, peqqissutsimullu naalakkersuisup, Asii Chemnitz Narupip, ajortussaqartinngilaa Kalaallit Nunaat tupatornerup tungaatigut killilersorfiunerpaanngussappat:
-Pujortartarneq peqqissutsimut ajoqutaavallaaleqimmat, taamaammat sakkortuumik iliuuseqartariaqarsorigatta aqqusiniinnarmi pujortartarnerup killilersuiffigineqalernissa siunnersuutiginiarparput. Pujortarpallaartarneq qaangerniarlugu taamatut siunnersuuteqarpugut, pimoorussigattalu akiliisitsisalernissaq aamma siunnersuutigalugu, Peqqissutsimut naalakkersuisoq Asii Chemnitz Narup oqarpoq.
Illoqarfigisami pujortarfiusinnaanngitsut killeqarfii sumiinnersut paasiniarneqarusuppata, teknisk forvaltningimut saaffiginnilluni tamanna paasineqarsinnaavoq.