Pujortartartut 35-leereersimasut misissorneqartariaqartut

35-nik ukioqalereersimaguit sikaritserpassuarnillu pujortartareersimallutit – quersukulaguillu anersaartorniarnerillu ajornartorsiutigisarlugu, taava ukioq allortarlugu pujortartarnerup kingunerisaanik pualluuteqarsoralutit misissorneqartariaqaraluarputit.

Danskit peqqissutsimut qullersaqarfiannit ima innersuussuteqartoqarpoq:

Puavit qanoq pitsaatiginerat paaserusukkukku piffissap sivisunngitsup ingerlanerani tamanna paasisinnaavat. Paasitinneqaruit pujortartarnerup kinguneranik puatit atorluarsinnaajunnaalersut taava piffissaagallartillugu nakorsiarsimassasutit, puaat pillugit peqatigiiffimmi pisortaq Charlotte Fuglsang oqarpoq.

- Nappaat kingusinaarlutit paasigukku taava anersaartuummik pinngitsuuisinnaajunnaarsinnaavutit.

Pujortartarnerup kinguneranik pualluuteqarujussuaraani assigaa milluaatikkut anersaartorneq. Aamma imminut mattuteqqajaasoqartarpoq, allaammi ullaakkut makinnissaq kajungernarunnaarluni anertikkarpallaarneq pissutigalugu, Charlotte Fuglsang oqarpoq.

Pujortartarnerup kinguneranik pualluuteqalerneq paasiaarneqarpat, nappaat kigaallatsinneqarsinnaavoq puaallu sulisinnaanerat annaanneqarluni. Taamaattumik peqatigiiffimmit puammit peqqissutsimut qullersaqarfimmit innersuussutigineqartoq nuannaarutigineqarpoq.

- Nappaat siusinaarluni paasineqarpat tamanna pitsaanerussaaq, taamaalillunimi assigiinngitsutigut katsorsarniarneqarsinnaammat, Charlotte Fuglsang oqarpoq.

Siullermik nappaat paasineqarpat napparsimasup pujortartarnini taamaatittariaqarpaa, taamaalilluni puaat ipiutaasartaasa aseroriartornerat unitsinneqarniassammat.

Peqqissutsimut qullersaqarfimmit ilaatigut innersuussutigineqarpoq pujortarunnaarnerup saniatigut pualluutillit nerisanut tunngatillugu siunnersorneqartassasut, nakorsaatitortinneqarlutik, qasujaallisartinneqarlutik anersaartornermullu sungiusartinneqartassasut. Taamaalillutik pitsaanerusumik inuuneqalersinnaaqqullugit, pisuttuarusussuseqalerlutik allaammi immaqa sikkilerusulersinnaallutik.