Pujortartarneq folketingilu
Danmarkimi Christiansborgimi pujortartarnermut maleruagassat nutaat eqqissiviilliortitsilerput. Matumani apeqqutaavoq qinikkat allaffimminni pujortarsinnaatitaassanersut. Enhedslisten aamma SF oqarput pujortarsinnaatitaasariaqanngitsut, isumaqaramik pujortartarneq pillugu inatsisissamut, aggustip qeqqani atuutilersussamut tamanna naapertuutinngitsoq. Allaammi Enhedslisten Folketingi sullivinnik nakkutilliisoqarfimmut Arbejdstilsynet-mut tunniutissallugu piareersimavoq.
Pujortartarfilersuineq, inuit ataasiakkaat allaffiini pujortarsinnaatitaaneq imaluunniit pujortarsinnaaneq tamaat inerteqqutigineqassava?
Pingasunngorpat Folketingip siulittaasoqarfiani præsidiami pujortartarneq pillugu inatsisip nutaap Christiansborgimi qanoq atuutsinneqarnissaa oqallisigineqassaaq. Tamannalu eqqissiunnaarutaalerpoq. Tassami Folketingimi ilaasortat ataasiakkaat allaffimminni pujortarsinnaatitaassanersut isumaqatigiinngissutaalerpoq. Enhedsliste-meersoq Jørgen Arbo-Bæhr isumaqarpoq pujortartarneq tamanut inerteqqutigineqassasoq.
- Tassami inatsimmi pineqarpoq inuit pujormiutinneqassanngitsut, Christiansborgimilu nalunngilarput allaffinnut inuppassuit isaasartut aamma nalunngilarput allaffiit kikkut tamat isersimaffigisartagaannut sammisuusut pujorlu tamaanga siaruaassinnaasoq, Jørgen Arbo-Bæhr oqarpoq.
Folketingip siulittaasoqarfiani siulittaasup Christian Mejdal-ip sisamanngormat partiit gruppeni siulittaasui ataatsimeeqatigai. Ataatsimiinnermi isumaqartoqarpoq pujortartarfinni ilaasortallu ataasiakkaat allaffiini pujortartoqarsinnaassasoq. Peqatigisaanik Christiansborgimi allaffimmiut ilaasortallu allattaat isumaqarput Christiansborgimi pujortartarneq inerteqqutaalivissasoq.
Christian Mejdal Folketingip siulittaasoqarfia pingasunngorpat ataatsimeereerpat aatsaat oqaaseqarsinnaalluni oqarpoq.
Folketingip siulittaasoqarfiata ilaasortat ataasiakkaat allaffiini pujortarsinnaaneq ajornartissanngikkaluarpagu Jørgen Arbo-Bæhr-ip tamanna inatsisinik unioqqutitsinerunersoq misilinniarpaa.
- Aggustip 15-anni inatsit atuutilerpat ullaakkut sullivinni nakkutilliisut Arbejdstilsynet Christiansborgimut aggersarniarpakka, qularinngilaralu oqassasut ilaasortat ataasiakkaat allaffii pujortarfigeqqusaassanngitsut, Jørgen Arbo-Bæhr oqarpoq.
