Pujortarneq puallarnarpoq

Pujortartartut pujortarneq ajortuniit salunnerusarnerannik oqartarneq oqaluttuaannanngorpoq. Kræftens Bekæmpelse-p nutaamik misissuisitsinerani tamanna erserpoq.

Pujortartartuugaanni oqimaannerulertannginneq, imaluunniit sanigornerusarneq, pingaartumik inuusuttuaqqat akornanni maluginiarneqarsimavoq. Kisiannigooq killormut pisoqartarpoq. Inuusuttut pujortartanngeriarlutik pujortartalersimasut, ukiuni marlunni pujortartareerlutillu puallarnerusarsimapput.

- Tamanna ilumoornersoq ilisimatusarnermut atasut aqqutigalugit paasiniarparput. Paasiniaanitsinni ersarivissumik erserpoq, pujortartarneq sanigornanngilluinnartoq – pingaartumik inuusukkaanni. Pujortartalersimasulli ukiuni siullerni marlunni kiilunik marlussunnik oqimaallisinnaapput, Kræftens Bekæmpelse-mi pilersaarusiornermut pisortaq, Per Kim Nielsen, nutaarsiassaqartitsivimmut Ritzauimut oqarpoq.

Timip inuussutissaminik suliarinninnera nikotinip annertusisittarpaa. Pujortartartuugaanni inuussutissat pujortartartup timaani uunneqartarnerat pujortarneq ajortup ullormut minutsini 20-30-ini timigissartarneranut assersuunneqarsinnaavoq.

- Pujortartartuugaannili timi aamma allanngorujussuartarpoq. Pujortartartut amerlanersaat aamma timigissartarunnaartarput, Per Kim Nielsen oqarpoq.

Misissuineq Danmarkimi atuarfinni klassini annerni ingerlanneqarpoq.